2020 Apr 12
මොහොතක් සිතන්න.., පසුගිය සති දෙකක කාලය තුළ ඔබ කොපමණ වාර ගණනක් සමාජ මාධ්‍ය තුළ සැරිසැරුවාද?..අප සිටින්නේ covid-19 වෛරසය ව්‍යාප්ත වීම හා සම්ප්‍රේෂණය වළක්වා ගැනීමට ඇදිරි නීතීය පනවා ඇති අවධියකයි. අප සියලු දෙනාටම නිවෙස් තුළම රැඳී සිටිමට සිදුවී තිබෙනවා. මේ කාලය තුළ ඇතිවන පාළුව හා කාන්සිය මගහරවා ගැනීමටත් ජීවිතයට නව ප්‍රබෝධයක් සහ ආශ්වාදයක් ලබා ගැනීමටත් සමාජ මාධ්‍ය වැඩි වශයෙන් පරිහරණයට අපි හුරුවී සිටිනවා. විවිධ පුද්ගලයන්ගේ අදහස් , තොරතුරු පරිශීලනය කිරීමට හා තමන්ගේ අදහස් බෙදාගැනීමටද මෙමගින් අවස්ථාව උදාවෙනවා. මේ දිනවල පුද්ගලයන් විසින් තමන් නිවසේ සිට සිදුකළ දේවල් එනම්.. සාදනු ලැබු විවිධ රසකැවිලි වර්ග, ව්‍යායාම් ක්‍රම,යෝගා ක්‍රියාකාරකම් , කියවනු ලැබු පොත්පත්, ඔවුන් විසින් ලියනු ලැබු කවි හො අදහස් වැනි දෑ අන්අය අතරේ සමාජ මාධ්‍ය හරහා බෙදාගැනීමට නැඹුරු වී තිබෙනවා. මේ අතර තවත් පිරිසක් තමන් කරන දේ අත්හදා බලන ලෙස පවසමින් අන් අයව උනන්දු කරවනවා.
සමාජ මාධ්‍යයේ අදුරු පැතිකඩ
සමාජ මාධ්‍යයන් බැලූ බැල්මට යහපත් බව පෙනුනත් අප මතක තබා ගත යුතු කරුණක් වන්නේ, ඒ තුලින් අපේ සිතුවිලි වලට ඍණාත්මක බලපෑමක් එල්ල කිරීමට හැකියාවක් ඇති බව. සිතන්න!….කෙනෙකු ඔහුගේ හෝ ඇයගේ සමාජ මාධ්‍ය ගිණුම හරහා තමා කරනු ලබන ව්‍යායාම් ක්‍රියාකාරකම් පටිගත කිරීමක් ලෙස හෝ සජීවී ලෙස සමාජ මාධ්‍ය හරහා වරින් වර බේදාගන්නේ නම් එවැනි අවස්ථාවකදී ඔබට ඔබ පිළිබඳවම ප්‍රශ්නාර්ථයක් ඇති විය හැකී, එනම්” ඇයි මට මෙයා වගේම කරන්න බැරි? ” ….
මෙවැනි අවස්ථා මගින් පිළිබිඹු වන්නේ යම්කිසි කෙනෙක් සමාජ මාධ්‍ය හරහා කරනු ලබන දේවල් දැකීමෙන් එවා කිරීමට අභිප්‍රායක් ඇති වනවාසේම අප නොදැනුවත්වම අප පිළිබඳව අවතක්සේරුවක් ඇති කර ගැනීමට එයම හේතුවක් විය හැකි බවයි. තමන් ගැන නැවත නැවත මෙලෙස සිතීමට ඉඩ හැරිමෙන් මානසික ව්‍යාකූලතා වලට පත්වීමට පවා ඉඩ තිබෙනවා. මානසික ආතතිය ,විෂාදය වැනි මානසික ගැටළු ඇති පුද්ගලයින්ට එම බලපෑම වැඩියී.
මෙවැනි සිතුවිලි සමග පොරබදිමින් ඔබත් පීඩා විදිනවා නම්, මේ ගැන සිතන්න …..
පුද්ගලයින් සමාජ මාධ්‍ය හරහා බේදාගන්නේ, ඔවුන් තෘප්තිමත් වූ දේවල් සහ ඔවුන්ගේ හැකියාවන් . එය සෑම කෙනෙකුටම පොදු තත්ත්වයක් නොවේ. ඊට හේතුව,අපි එකිනෙකාට වෙනස් .අපි එකිනෙකාට විවිධ කුසලාතා පිහිටා තිබෙනවා .එක් පුද්ගලයෙක් එක් කාර්යකට දක්ෂ විය හැකි නුමුත් තව පුද්ගලයෙක් එම කර්යයට දක්ෂ නැතිවෙන්න පුළුවන්. නුමුත් ඔහු වෙනම කර්යයකට දක්ෂ විය හැකියි.
ඔබ ඔබෙන්ම අහන්න.”ඔබේ මිතුරන් සහ නැදෑයින් විසින් සිදු කරන්න අකැමැති දෙයක් සිදු කරන්න කියා ඔබ පවසාවිද? ” , අනිවාර්යයෙන්ම එහි පිළිතුර “නැත” යන්නයි.
අපි සමාජ මාධ්‍ය තුල දකින සෑම දෙයක්ම කරන්න උත්සාහ නොකළ යුතුයි .විශේෂයෙන්ම එය ඔබේ ක්‍රමයට ගැලපෙන්නේ නැති නම් එය නොකර සිටීම වඩා හොඳයි. කරන දේත් ඒ ආකාරයෙන්ම සිදු කරන්න ඔබට නොහැකි නම් කනස්සලු නොවී ඔබට පුලුවන් ලෙස එය සිදු කරන්න. එය එසේ කරත් සාර්ථක නොවුනේ නම් එය අමතක කරන්න .විරාමයක් ගන්න, සුව නින්දක් ලබා ගන්න, විවේකයක් ගන්න, සමාජ මාධ්‍යයන් තුල දකින පුද්ගලයින් සමග අපේ ජීවිත සංසන්දනය කිරීමට යැමෙන් අප අපවම අවතක්සේරු කර ගන්නවට වඩා තමන්ගේ ජීවිතයට ලැබී තිබෙන ආශිර්වාද මතක් කර ගන්න. ඔබ සතුටු වන දේවල්, ඔබට සම්පුර්ණයැයි හැගෙන දේවල් ,ඔබගේ ආත්ම විශ්වාසය වැඩි වන දේවල් පමණක් කරන්න නිතරම සිතට ගන්න.
