2021 Jul 26
ගිය සතියේ දාපු ලිපියේ දෙවැනි කොටසින් තමයි මේ අපි මුණ ගැහෙන්නේ. ඉතින් ඔයාලා දැනටමත් දන්නවා කොහොමද මේ මොලේ හැක් කරන්නේ කියලා. ගිය සැරේ කිව්ව විදිහට මයින්ඩ් පැලස් එකක් හදාගන්න ට්‍රයි කරලා එහෙම බලන්න ඇති නේද? අද අපි බලමු අපේ මොලේ අපිට ඕන විදිහට හැක් කරලා එහෙමත් නැතිනම් හසුරුවලා අපිට කරන්න පුළුවන් තව වැඩ මොනවද කියලා. කලින් ලිපියෙන් අපි කතා කරපු, ඔයාලා ගොඩනගා ගත්ත mind palace එක දිගටම පවත්වාගෙන යන්නත් අපි මේ කතාකරන්න යන්න දේවල් ඔයාලට උදවුවක් වෙයි.
අලුතෙන් දෙයක් එකතු වෙද්දී පරණ මතකේ අයින් වෙනවද??
මේක ඉතින් අහන්නත් දෙයක්ද. බොහෝ වේලාවට මේක අපි හැමෝටම සිද්ධ වෙන දෙයක්. ඇත්තටම මේකට හේතුව තමයි අපේ තියෙන රැම් එකයි රොම් එකයි දෙකක්. පැහැදිලි මදිද? සරලවම කිවුවොත් ඒ කිව්වේ අපේ මතකය කොටස් දෙකකට වෙන් කරන්න පුළුවන්. කාලයක් නිතර මනසට ගෝචර වෙලා ස්ථාවර උන මතකයන් සහ පොඩි පොඩි සිද්ධි නිසා එකතු වුණ තාවකාලික මතකයන් විදිහට. මෙහෙම මතකය ස්ථාවර වෙන්න සහ තාවකාලිව වෙන්න බලපාන වැදගත්ම සාධකය තමයි ඔයා මතකයට දාගන්න දේවල් වලට ඔය කොච්චර ආසද එහෙම නැත්තන් ඔයාගේ ජීවිතේට කොච්චර ඒ දේවල් බලපානවද කියන කාරණය. සරලම විදිහට කියනවනම් ඔයා ආසම විෂය මතක් කරගන්න. ඔයාට පංති නොගියත්, පාඩම් නොකරත් ඔයා ඒ ගැන තියෙන ආසාව නිසාම ඒ ඔක්කොම මතක තියන් ඉන්නවා නේද ? ඔයා අකැමතිම විෂයට සමහර විට පංති කිහිපයකට ගියත් ඔයාට කිසිම කරුණක් මතක නැති වෙන්න තියෙන ඉඩ ගොඩක් වැඩියි.
මේ විදිහට මතකය අලුත් වෙද්දී පරණ මතකය ඉවත් වෙන එක ඉබේටම සිද්ධ වෙන දෙයක්. ඔයාට සමහර විට හිතෙන්න පුළුවන් මට ඔක්කොම මතකයි කියලා නමුත් ඔයාගේ අලුත් මතකය එක්ක පරණ මතක ඉතිරි වෙන්නේ සුළු ප්‍රමාණයක් විතරයි. හොදම උදාහරණය තමයි ඔක්කොම මතකයි කියලා විභාගයට ගියාම මොනවත් මතක නෑ කියල දැනගන්න එක. මේ අත්දැකීම අඩු වැඩි වශයෙන් අපි ඕනෑම කෙනෙක්ට තීයෙනවනේ.
මං දන්නවා දැන් ඔයා හිතන දේ. ඔයා හිතන්නේ මේක හරිම අමාරු වැඩක්. අපිට අමුතු බලයක් නෑ ඕවා මතක තියාගන්න වගේ. එත් මං මේ කියන දේ එක්ක ඔයා පිලිගනියි ඔයාටත් හොද බ්‍රේන් කැපෑසිටි එකක් තියනවා කියලා. ඔයාට ටර්ම් ටේස්ට් එකක් ලං වෙද්දී ඔක්කොම පාඩම් කරලා කොහොමහරි එක විෂයක් හරි සාර්ථකව ලියලා ඇතිනේ. හොදට මතක් කරලා බලන්න ටේස්ට් එක ඉවර උන ගමන් ඔයා පාඩම් කරපු එකක්වත් ඔලුවේ නෑ නේද කියලා. ඉතින් ඔයාටත් මේ කියන පවර් එක තියෙනවා හැබැයි එකෙන් හරියට වැඩක් ගන්නේ කොහොමද කියලයි ඔයා තවම නොදන්නේ.
කොහොමද ස්ථිර මතකයක් හදාගන්නේ?
ඔච්චර කල්පනා කරන්න එපා. මේක කරන්න ගොඩක් ලේසි ක්‍රම තියෙනවා. දැනට විද්‍යාත්මකව ඔප්පු කරලා තියෙනවා අපට අමතක වීම සිද්ධ වෙන්නේ එක සිස්ටම් එකකට කියලා. මේක බොහෝ විට කලින් ලිපියේ දාපු මයින්ඩ් පැලස් කියන සංකල්පයට වඩා සාර්ථකව ට්‍රයි කරලා බලන්න පුළුවන් වෙයි. මුලින්ම මේ පහළ ඇනිමේෂන් එක බලන්නකෝ. මේක මං හොයාගත්තේ විකිපීඩියා එකෙන්.
ඉතින් ඔන්න ඕක තමයි මතකය ස්ථාවර කරගන්න ක්‍රමය.
මේක මෙහෙම පැහැදිලි කරන්නම්. හිතන්න ඔයා භාශාවක් ඉගෙන ගන්නවා කියලා. ඉතින් මේ ක්‍රමය පාවිච්චි කළොත් මාස කීපයකින් ලොකු ප්‍රථිපලයක් ගන්න ඔයාට පුළුවන් වේවි. ඔයාට තියෙන්නේ ඔයාට මතක තියාගන්න ඕන වචන මේ විදිහට පෙට්ටි තුනකට දාන එක. ඒ පෙට්ටි තුන නම් කරනවා දිනපතා, සතිපතා, මාසිකව කියලා.
දැන් ඔයාට කරන්න තියෙන්නේ දිනපතා එක හැමදාමත්, සතිපතා එක සතියකට වතාවකුත්, මාසික එක මාසෙකට වතාවකුත් බලන එක තමයි. ඔය විදිහට ඔයාට පොඩි පොඩි නෝට්ස් පෙට්ටි තුනක දාලා මතකය ටේස්ට් කරන්න පුළුවන්. මතක ඒවා ඔය ඇනිමේෂන් එකේ විදිහට පෙට්ටි වලට මාරු කර කර ඔයාට දිනපතා ඒවා මතක නම් සති පතා පෙට්ටියට ඒවා දාල සතියකට වරක් බලන්න. ඒවත් මතක නම් මාසික පෙට්ටියට මාරු කරන්න. මොනවහරි අමතක නම් දිනපතා පෙට්ටියට දාන්න. මේ විදිහට කරලා බලන්න. ඔයාගේ මතකය නොහිතන වේගෙන් දියුණු වෙයි.
ඉතින් ඕක තමයි අපේ මතකය නැති කරගන්නේ නැතුව දිගටම පවත්වාගෙන යන්න අපිට පාවිච්චි කරන්න පුළුවන් ලේසිම ක්‍රමය. ඔයාගේ ඉගෙනීම් කටයුතු වලදී විතරක් නෙමෙයි රාජකාරී කටයුතු වලටත් මේක වෙනස් වෙනස් විදිහට පාවිච්චි කරන්න ඔයාට පුළුවන් වෙයි. ඉතින් උත්සහ කරලා බලන්න. තුන්වෙනි කොටසෙනුත් අපේ සැගවුණු super powers මොනවද කියලා අපි තව හොයලා බලමු.
-සචිනිකා තත්සරණි-
