2021 Oct 26
USB, ඒ කියන්නෙ Universal Serial Bus. මෙය අපි එදිනෙදා පාවිච්චි කරන ගොඩක් උපකරණවල තියෙන පෝර්ට් එකක් වගේම අපි හැමදාම වගේ පාවිච්චියටත් ගන්න දෙයක්. ලැප්ටොප් එකක් කම්පියුටර් එකක් වගේ ගත්තොත් ඔයාට මෙන්න මේ විදිහෙ USB Port එකක් බලාගන්නක ලැබෙනවා. මේකට කියෙන්නේ USB Type A Port එකක් කියලා.
ඉතින් ඒ වගේම ඔයාගෙ ෆෝන් එක තියෙනවනේ. ඒක චාර්ජ් කරන්නත් ඔයා ගොඩක් වෙලාවට මේ USB වර්ගයේ පෝර්ට් එකක් පාවිච්චි කරනවා වෙන්න පුලුවන්. මොකද දැනට කාලෙක ඉඳල එන ගොඩක් ෆෝන්ස් මේ USB හරහා තමයි චාර්ජ් කරන්න පුලුවන් වෙන්නේ. මේ වගේ උපකරන චාර්ජ් කරන්න අපි Micro USB සහ USB Type C කියන Ports පාවිච්චි කරනවා.
ඉතින් දැන් එන අළුත් ස්මාර්ට් ෆෝන් හැම එකක්ම වගේ උඩ පෙන්නල තියෙන USB Type C කියන කනෙක්ටර් එක හරහා තමයි චාර්ජ් කරන්න පුලුවන් වෙන්නේ. ඒ වගේම දැන් එන සමහර ලැප්ටොප් පවා මේ කනෙක්ටර් එක හරහා චාර්ජ් කරන්න පුලුවන් වෙලා තියෙනවා. හැබැයි ඇපල් සමාගමනම් තාමත් එයාලගෙ අයිෆෝන් වලට අනිත් හැමෝම පාවිච්චි කරන USB Type C Port එක නැතුව එයාලගෙන ලයිට්නින් කියලා සදහන්වන පෝර්ට් එකක් තමයි පාවිච්චි කරන්නෙ.
ඉතින්, මේ USB Type C කියන එක විශේෂ වෙන්නෙ ඇයි ? ඒකට හේතු කිහිපයක් තියෙනවා. ඔයාගෙ ලැප්ටොප් එකයි, ෆෝන් එක සහ ඉයර් බඩ්ස් වගේ පාවිච්චි කරනවනම් ඒවටයි වෙන වෙනම චාජර් තියෙනකොට ඒක අවුල් ජාලයක්නෙ. අනික ඔයා නිතර ට්‍රැවල් කරන කෙනෙක්නම් මේවත් අරගෙන තැන් තැන්වල යන එකත් ගොඩක් කරදරකාරී දෙයක්. ඉතින් මම කලින් කීව වගේ ෆෝන් එක, ලැප්ටොප් එක වගේ ඔයාගෙ ඩිවයිස් හැම එකක්ම එකම විදිහෙ චාජර් එකකින් චාර්ජ් කරනකොට ඔයාට ගොඩක්ම ලේසි වෙනවා.
චාර්ජ් කරන එකට අමතරව මේ Type C Port එක හරහා අපිට ලැප් එකක් හෝ ෆෝන් එකක් අමතර මොනිටර් එකකට කනෙක්ට් කරන්න, Ethernet හරහා නෙට්වර්ක් එකකට කනෙක්ට් කරන්න වගේ පහසුකම් ලැබෙනවා. මේ වෙද්දි තියෙන ලේටස්ම Type C එක හරහා තත්පරයට ගිගා බිට් 40ක දත්ත හුවමාරු කරන්න පුලුවන්. ඒ කියන්නෙType C එක්ක ඔයාට ගිගාබයිට් 5 ක ෆයිල් එකක් තත්පරයක් වගේ කාලෙකින් හුවමාරු කරන්න පුලුවන් වෙනවා.
මේ වගේ හැකියාවන් ගොඩක් තිබුනට Type C පෝර්ට් එකේ එක දුර්වලකමක් තියෙනවා. ඒ තමයි විදුලිය සම්ප්‍රේශනය කරන හැකියාව. එහෙම වෙන්නෙ කොහොමද ? කලින් කීවනෙ මේකෙ ලැප්ටොප් පවා චාර්ජ් කරන්න පුලුවන් කියල ?. හරි, ලැප්ටොප් චාර්ජ් කරන්න Type C පෝර්ට් එකට පුලුවන් උනාට මේ පෝර්ට් එක හරහා චාර්ජ් කරන්න පුලුවන් වෙන්නෙ ගොඩක් අඩු බලයක් තියෙන ලැප්ටොප්. ඒ කියන්නෙ ඔයාට වෙනම GPU එකක් එහෙම තියෙන ගේමින් ලැප්ටොප් එකක් තියේනම් ඔයා අන්න ඒ වගේ ලැප්ටොප් චාර්ජ් කරන්න Type C එක පාවිච්චි කරන්න පුලුවන් වෙන්නෙ නෑ.
එහෙම වෙන්නෙ කලින් කීවා වගේ මේ දැනට භාවිතයෙ තියෙන Type C පෝර්ට් එක හරහා සම්ප්‍රේශනය කරන්න පුලුවන් උපරිම වොට් ගාන වොට් 100 ( 100W = 20V*5A ) නිසා. ඉතින් ගේමින් ලැප්ටොප් වගේ ඒවා පාවිච්චි කරද්දි වොට් 100 ත් 300 ත් අතර ගානක් පාවිච්චි කරන නිසා මේ වගේ ගේමින් ලැප්ටොප් Type C හරහා චාර්ජ් කරන්න බැරිවෙලා තියෙනවා.
දැන් ඔයා කල්පනා කරනව ඇති වොට් ගානයි ඈම්ප් ගානයි වැඩි කරොත් අපිට වැඩිපුර බලයක් මේක හරහා යවන්න පුලුවන්නෙ කියල. ඔයා හරි, ඒත් මේ නිසා “ආර්ක්” යනුවෙන් හඳුන්වන කුඩා විදුලි කෙටීම් ඇතිවෙනවා කේබල් එක සහ උපකරණයෙ පෝර්ට් එක අතර. අන්න ඒ නිසා අපි දැනට මේ Type C පෝර්ට් එක හරහා ගෙනියන බලය වොට් 100 කට සීමා කරල තියෙනවා.
ඒ වුනාට USB සම්බන්ධව සංවර්ධන කටයුතු සිදුකරන ආයතනයෙන් අපිට අළුත්ම ප්‍රවෘත්තියක් දීල තියෙනවා මේ දේ අවසන් කියලා. එයාල කියන විදිහට අපිට ඊළඟට දකින්න ලැබෙන Type C මීළග පරම්පරාවෙ පෝර්ට් එක වොට් 240 ක් දක්වා බලයක් සම්ප්‍රේශනය කරන්න පුලුවන් වෙනවා. මම කලින් කීව ආර්ක් ඇතිවෙන එක වලක්වන්න මේ පෝර්ට් සහ කේබල් විශේෂ අමුද්‍රව්‍ය වලින් තමයි නිෂ්පාදනය කරන්න කටයුතු යොදල තියෙන්නේ. ඉතින් මේ Port එක හරහා අපිට RTX 3060, 3070 වගේ තියෙන Gaming Laptop එකක් උනත් බලගන්වන්න හැකියාව තියෙනවා. ඉතින් ඔයා ගේමින් ලැප්ටොප් එකක් වගේ පාවිච්චි කරනවනම් අනාගතයෙදි ට්‍රැවල් කරද්දි, යුනිවසිටි එකට යද්දි චාජර් ගොඩක් එල්ලගෙන යන්න ඕනෙ වෙන එකක්නම් නෑ.
-ධනංජය පසන්-
