2021 Oct 22
අපි කවුරුත් හීන දකිනවා. ඒ හීන සමහරක් හැබෑ වෙනවා. ඒත් සමහර හීනනම් ,හීන විතරක්ම වෙනවා. අපි අවදියෙන් ඉද්දි දකින හීනයි නිදාගෙන ඉද්දි දකින හීනයි හරි වෙනස්. නිදාගෙන ඉද්දි දකින ගොඩක් හීන වලට සැඟවිච්ච හරි අපූරු අර්ථ තියෙනවා. හොඳ සිහින වගේම නරක සිහිනත් මේ අතර ගැබ් වෙනවා. එම නිසාම මේ කියන්නා වූ සිහින ගැන වැඩි අවධානයක් යොමු කළොත් හොඳයි. බොහෝ වේලාවට අපි දකින සිහින මඟින් පිළිබිඹු කරන්නේ චිත්තවේගයන්, හැඟීම් දැනීම් ,විශ්වාස හා සිතුවිලි ආදිය. මේ කියන්න යන්නේ බොහෝ දෙනා දකින පොදු හීනවල ගැබ් වෙච්ච සැඟවිච්ච අර්ථයන් ගැනයි.
පරීක්ෂණයකින් අසමත් වෙනවා දැකීම……
පරීක්ෂණයක් කියූ විගසම අපේ හිතට ඇති වන්නේ බියක්. කොච්චර මහන්සි වෙලා සූදානම්වෙලා හිටියත් පරීක්ෂණයන්ට මට මේ දේ කරගන්න හැකිවේදෝ නොහැකි වේ දෝ කියලා අපේ හිතේ කොනක හරි බියක් තියෙනවා. සාමාන්‍යයෙන් අපි කොයි කවුරුත් පරීක්ෂණ වලින් අසමත් වෙලා තියෙනවා. හැබැයි සිහින ලෝකයේ දී ඒක ටිකක් වෙනස්. මේ සිහින ලෝකයේ දී යම් විභාගයකින් අසමත් වනවා දුටුවොත් ඔබට ඔබගේ ජීවිතයට හා ඔබ ගෙවන්නා වූ ජීවිකාවට වැඩි අවධානයක් යොමු කරන්නට සිදු වෙනවා. මේ සිහිනයේ සැබෑම අරුත වන්නේ ඔබට අවශ්‍ය තරමට ආත්ම ශක්තියක් නැති බවයි. ආත්ම ශක්තිය ජීවිතයේ කොතරම් අවැසිද කියා මම ඔබට අමුතුවෙන් කිවයුතු නැත. ඉතින් යම් යම් දේවල් ඔබ ජීවිතයේදී උත්සාහ කරද්දී එයට අවශ්‍ය විශ්වාසය සහ ආත්ම ශක්තිය නොමැතිකම නිසා හිතේ ඇති කලබලයට මෙවැනි හීන පෙනෙන්නට පුළුවන්.
ඔබ මෝටර් රථයක් පදවාගෙන යනවා දුටුවොත්…..
තමන්ගෙ කියලා වාහනයක් ගන්න සිහින දකින කොතරම් පිරිසක් ඇත්ද? තමන්ගෙම හිතමිතුරන් සමග වාහනය පදවාගෙන යන්න හීන දකින අය අද සමාජයේ බොහෝ දක්නට ලැබෙනවා. ඒකට කියන්නේ වාහන සිහිනය නැතහොත්” රථ ගාය” . ඉතින් මෙවැනි සිහිනයක් ඔබ දුටුවොත් එයින් පැවසෙන්නේ ඔබ ඉතාම ප්‍රීතියෙන් කාලය ගත කරනවා යන්නයි. නමුත් ඔබ ඉදිරියේ මෝටර් රථයක් තිබිලත් ඔබ එය නොපදිනවනම් එයින් කියැවෙන්නේ ඔබට කිසි සතුටක් නැති බවයි. ලැබී ඇති දෙයින් ඔබ සෑහීමකට පත් නොවන බවයි. තවද මොන ප්‍රශ්නය ජීවිතයට ආවත් ඔබ එයට මුහුණ දෙමින් ඉදිරියට යාමට කැමති අයෙක් බවයි.
ඔබ ලිංගික සබඳතාවක් පවත්වනවා දැකීම…….
ඔබ ලිංගිකව එකතු වන විටදී සතුටින් හිදිනවා දුටුවොත් එයින් කියවෙන්නේ ඔබේ සහකරුවා හෝ සහකාරිය ගැන ඉතා පැහැදීමකින් සිටින බවයි. එකිනෙකාගේ රූපය පිළිබඳව සෑහීමකින් ඔබ සිටින බවයි. එහෙත් ඔබ එම අවස්ථාවේ කිසිදු හැගීමක්කින් තොරව සිටියේ නම් එයින් අදහස් වන්නේ ඔබ ඔබ පිළිබද අවතක්සේරුවකින් ඉන්නවා යන්නයි. ඔබගේ පෙනුම ,රූපය , අඟ පසඟ ගැන සතුටින් පසු නොවනවා යන්නයි.
ඔබ සිහිනයෙන් ඇද වැටෙනවා දැකීම……..
මෙය ඔබට දිස් වන විටදී යම් ගැස්සීමක්, බියක් මනසේ ඇති වන්නට පුළුවන්. බොහෝ වෙලාවට බොහෝ අයවලුන් ගැස්සී නින්දෙන් අවදිවෙන වෙලාවන් ඇත. එහෙත් මෙම සිහිනයෙහි තේරුම වන්නේ ඔබ අවිශ්වාසයෙන් සහ පසුතැවීමකින් කල්ගෙවනවා යන්නයි. මෙය දිස් වෙන්නට ප්‍රධානම හේතුව ඔබගේ සිතෙහි ඇති දැඩි අවිශ්වාස යයි. නමුත් ඔබ වැටෙන අවස්ථාවේ ප්‍රීතියෙන් සිටියා නම් එයින් කියැවෙන්නේ ජීවිතයේ ඔබට මුහුණ දෙන්නට වන සෑම ප්‍රශ්නයකටම හොඳාකාරවම මුහුණ දෙමින් ඉදිරියට යාමට කැමති බවයි.
පිරිසක් මැද ඔබ නිරුවත්ව සිටිනවා දැකීම………
මෙය නම් මදක් සිනහ නංවන සහ බියක් ඇති කරන සිහිනයක්. මෙයින් කියවෙන්නේ වෙනස්ම දෙයක්. එනම් ඔබ ඔබගේ පෞරුෂය සම්බන්ධව ප්‍රබල දුර්වලතාවයකින් සිටින බවයි. මෙවැනි හීන පෙනෙන්නේ බොහෝවිට සමාජය තුළ හැසිරෙන්නට කැමති නැති අයටයි. ඔවුන් මිනිසුන් සමග ගැටෙන්නට බියක් දක්වන නිසා ඔවුන්ගේ දුබලතා අනික් අය දැන ගනීවි කියලා ඔවුන් බියට පත්වෙනවා. එසේ වුවහොත් ඔවුන් සමාජයේ සිනහවකට සමච්චලයට පාත්‍ර වෙයි යන හැඟීම නිසා ඔවුන් නිතරම පසුවන්නේ බියකින්. මේ නිසයි ඔවුන්ට මේ ආකාරයේ සිහින දිස් වන්නේ.
යම් භයානක දෙයක් ඔබ ලුහුබඳිනවා දුටුවොත්…..
යම් භයානක දෙයක් ඔබ ලුහුබඳිනවා දුටුවොත් එයින් අදහස් වන්නේ යම් පීඩාකාරී තත්ත්වයකට ඔබ මුහුණ දෙමින් සිටින බවයි. කිසියම් ප්‍රශ්නයකට මැදිව එයින් ගැලවීමට නොහැකිව ඔබ ප්‍රශ්නය අතර දෝලනය වෙමින් සිටින බවයි. ඔබ නිතරම ඔබේ ප්‍රශ්නය ගැන සිතමින් කාලය ගත කරන නිසා මෙවැනි භයානක සිහින පෙනෙන්නට පුළුවන්. ඔබටත් එම ගැටලුවෙන් ඉක්මනින්ම නිදහස් වීමට අවශ්‍ය බවද ඉන් කියැවෙයි.
වැසිකිලියක් සොයා ගැනීමට බැරිව ඔබ කලබලෙන් සිටිනවා දැකීම….
ඔබට වැසිකිළියට යාමට අවශ්‍ය වුවත් ඔබට වැසිකිලියක් සොයාගැනීමට නොහැකිව සිටිනවා ඔබ දුටුවොත් එයින් අදහස් වන්නේ ඔබ ඔබේ අවශ්‍යතාවයන් සහ අදහස් ප්‍රකාශ කර ගන්නට නොහැකිව පීඩාවට පත්ව සිටින බවයි. මෙවැනි පුද්ගලයන් තමන්ගේ වැඩ පසෙකලා අන් අයගේ වැඩ වලට අවධානය දෙයි . එම නිසා ඔවුන්ට තමන්ගේ කාර්යභාරයවත් හරියට ඉටු කරගන්න අවස්ථාවක් හෝ වෙලාවක් නැහැ. එමනිසා ඔවුන් සිටින්නේ සහ කල් ගෙවන්නේ දැඩි පීඩනයකින්. මේ වගේ අවස්ථාවල තමයි මෙවැනි සිහින ඔවුන්ට පෙනෙන්නට පටන් ගන්නේ.
සිහිනෙන් ඔබේ දත් වැටෙනවා දුටුවොත්.
මේක නම් කොයි කවුරුත් දකින්න ප්‍රිය කරන සිහිනයක් නම් නොවෙයි. නමුත් මෙයින් ඔබේ චරිතය ගැන බොහෝ දේවල් කියැවෙයි. ඔබ ඔබගේ රූපය ගැන වැඩි අවධානයක් දෙන කෙනෙක්. මේ නිසා ඔබ ඔබට තිබෙන දෙයින් සතුටට පත්වන්නේ නැහැ. ලද දෙයින් ඔබ සතුටු වෙන්නෙත් නැහැ. මේ නිසා ඔබ කාන්සාමය තත්වයකින් ඔබ පසු වෙනවා. ඔබේ පෙනුම නිසා ඔබ සමාජයෙන් ප්‍රතික්ෂේප වේ යැයි සිතනවා. ඔබගේ ආදරණීයයන් ගෙන් ඔබ ප්‍රතික්ෂේප වේ යැයි සිතනවා. මේ නිසා ඔබ නිතරම පසුවන්නේ අන් අය ඔබගේ රූපය ගැන මොනවා කියාවිදැයි බියකින්. එම නිසා මේ ආකාරයේ සිහින ඔබට පෙනෙන්නට පුළුවන්.
– තොරතුරු අන්තර්ජාලය ඇසුරෙන්
– තෙපුලි මන්දාකිණී-
