2020 Nov 12
රටපුරා පැතිරෙමින් යන COVID-19 වෛරසය ආසාදනය වීමෙන් ගැලවෙන්න නම් මහජනතාව විදිහට අපි මොකද කළ යුත්තේ..?
මේ වෙනකොට අපට කළ හැකි ප්‍රධානම දෙයක් තමයි පෞද්ගලික ආරක්ෂාව අපි විසින්ම සළසා ගැනීම. ඒ කියන්නෙ නිතර අත් සෝදමින් මුහුණු ආවරණ පළඳිමින් සහ මීටරයක දුර පවත්වා ගනිමින් දෛනික කටයුතු කරගෙන යාම. නමුත් එතනින් එහාට සමාජයක් විදිහට අපි කොහොමද මේ වෛරසයෙන් බේරීම වෙනුවෙන් කටයුතු කරන්නෙ කියන එකත් අපි සළකා බැලිය යුතුමයි. අපි හැමෝටම එදිනෙදා වැඩකටයුතු, රැකියා කටයුතු ආදියට යන්න සිදුවෙනවා. මේ වනවිට අපට වෛරසය සමග අරගල කරමින් දෛනික ජීවිතය පවත්වාගෙන යාමට සිදුවී තිබෙන නිසා තවදුරටත් අපිට නිවාස තුළ පමණක් සිටිමින් කොරෝනා වෛරසයෙන් ගැලවීම කළ නොහැකියි. නමුත් මේ විදිහට පිටතට යද්දී අපේ ආරක්ෂාව වෙනුවෙන් ඒ ඒ තැන් වල වාර්තා සටහන් කරගැනීම ප්‍රායෝගිකද..? එහෙම කරන ක්‍රමවේදය ප්‍රායෝගිකද.? කියන කාරණය ගැටළු සහිතයි. බොහෝ දෙනෙක් මේ වාර්තා සටහන් කරගැනීම නැතිනම් tracing වෙනුවෙන් පාවිච්චි කරන්නේ පොතක අදාළ දත්ත සටහන් කරන ලෙස එතැනට පැමිණෙන්නන්ට දැනුම් දීම. මේ කටයුත්ත ප්‍රායෝගිකව එතරම් සාර්ථක ක්‍රමයක් නොවෙයි. ඒ පිළිබඳව බොහෝදෙනෙක් සමාජ මාධ්‍ය හරහාත් තමන්ගේ මතයන් ප්‍රකාශ කරමින් සංවාදයක් ගොඩනගා තිබුනා. පළමුවැන්න නම් ඕනෑම කෙනෙකුට සාවද්‍ය තොරතුරු ඇතුළත් කිරීමේ හැකියාවක් තිබෙනවා. එහෙම වුනොත් සම්පුර්ණ පද්ධතියම නොමග යැවීමක් සිදුවිය හැකියි. ඊළඟ ගැටළුව මේ පොත සහ පැන හරහා වෛරසය ව්‍යාප්ත වීමත් සිදුවිය හැකි සම්භාවිතාවක් තිබීම. මේ ප්‍රශ්නයට විසඳුමක් තිබිය හැකිද..?
පිළිතුර “ඔව්” කියන එක. මේ වෙනකොට තාක්ෂණික විසඳුමක් සොයාගෙන තිබෙනවා. Smart phone එකක් කියන්නේ බොහෝ දෙනෙක් සතු උපකරණයක්. ඒක තවදුරටත් සුඛෝපභෝගී භාණ්ඩයක් නොවෙයි. ඒ නිසා මේ ස්මාට් ෆෝන් එක භාවිත කරමින් ඔබ යන එන සෑම තැනකම ඒ යාම් ඒම් ගැන සටහන් කෙරෙන ක්‍රමවේදයක් නිර්මාණය කරලා තියෙනවා. මේක ඉතාම සරළ QR code එකක් හඳුන්වා දීමෙන් කළ දෙයක්. මේ යටතේ වෙළඳසල්, ආයතන සියල්ලකටම වගේ ඔවුන්ට අදාළ QR Code එකක් ලබාදෙනවා. ඒක මුද්‍රණය කරල අදාළ ආයතනයේ පිවිසෙන තැනක ප්‍රදර්ශනය කිරීම තමයි මේ සැළසුමේ පලවෙනි පියවර.
ඊළඟට ඔබ එම ආයතනයට / ස්ථානයට යනවා නම් කරන්න තියෙන්නේ ඉතාම සරළ දෙයක්. ඔබේ Smart phone එකේ කැමරාව On කරලා මේ ප්‍රදර්ශනය කරලා තියෙන QR Code එක ඒකෙන් scan කරගැනීම ඔබට කළ හැකියි. නමුත් ඕනෑම දුරකතනයක කැමරාවෙන් මේ QR Code එක scan කිරීම සිදු කරන්න බැහැ. එවැනි අවස්ථාවක ඔබ ඔබේ දුරකතනයේ සිංහල අකුරු සඳහා භාවිත කරන හෙළකුරු App එක හරහා ඔබට මේ QR Code එක scan කිරීම සිදුකළ හැකියි.
ඉන් පසු ඔබට කෙටි දැනුම්දීමක් (instant alert එකක්) ලැබේවි. එකෙන් කියවෙන්නේ www.staysafe.gov.lk කියන වෙබ් අඩවියට පිවිසෙන්න කියන පණිවිඩය. ඒ alert එක touch කළ සැනින් අදාල වෙබ් අඩවියට පිවිසෙනවා. ඔබේ Smart phone එකේ Data On කරලා තිබීම අත්‍යවශ්‍යයි මේ කටයුත්තට. දැන් ඔබ Web එකට Log වුනා කියල හිතමු. එතැන තියෙනවා පෝරමයක්. එතනට ඔබේ පෞද්ගලික විස්තර ලබාදීම කළ යුතුයි. නම, ලිපිනය, දුරකථන අංකය වගේ විස්තර ටිකක් ඒ පෝරමයට ලබාදිය යුතුයි. දැන් ඔබ මේ තොරතුරු ජාලයට සම්බන්ධ වී අවසන්. ඊළඟට ඔබ යන එන ඕනෑම තැනක ප්‍රදර්ශනය කරලා තියෙන QR Code එක ඔබේ දුරකථනයේ camera එක මගින් Scan කරගන්න. ඇතුල්වීමේදී වගේම පිටවීමේදී මේ ක්‍රියාව කිරීම පමණයි ඔබ කළ යුත්තේ. ඊළඟට ඔබට ලැබෙන web alert එක touch කරනවාත් සමගම ඔබ යන එන තැන් පිලිබඳ විස්තරයක් අදාළ තොරතුරු ජාලයේ යාවත්කාලීන කෙරෙනවා. විසඳුම සරළයි.
මේ QR Code එක මොන විදියේ තැන්වලද පාවිච්චි වෙන්නේ? මේ වෙද්දි පෞද්ගලික ව්‍යාපාරික ස්ථාන, පෞද්ගලික ආයතන, රජයේ කාර්යාල, පන්සල් පල්ලි ඇතුළු ආගමික ස්ථාන සහ පොදු ප්‍රවාහන සේවාවන්වල මේ ක්‍රමවේදය අනුගමනය කළ යුතු බවට රජය නිවේදනය කරලා තියෙනවා. කෙනෙකුට ගැටලුවක් ඇතිවෙන්න පුළුවන් මේ ලබාගන්නා තොරතුරු නිසා තමන්ගේ පෞද්ගලිකත්වයට හානියක් වෙයිද කියලා. නමුත් මේ සියලු තොරතුරු රජයේ අධි ආරක්ෂිත දත්ත ගබඩාවක තමයි ගබඩා කෙරෙන්නේ. ඒ වගේම ඒ දත්ත නැවත ලබාගැනීම, පරිහරණය කිරීම කළ හැක්කේ COVID-19 වැලැක්වීමේ ව්‍යාපෘතියට සම්බන්ධ වගකිවයුතු නිළධාරීන්ට පමණයි. ඔබගේ හෝ ඔබගේ ආයතනයේ QR Code එකට අදාළ කිසිදු තොරතුරක් වෙනත් කිසිදු තුන්වැනි පාර්ශවකරුවෙකු සමග බෙදාගැනීමක් සිදුවන්නේ නැහැ. ඒ නිසා තොරතුරුවල රහස්‍යභාවය සම්බන්ධව සැකයක් ඇති කරගැනීම අවශ්‍ය වන්නේ නැහැ.
ඔබ වෙළඳසලක් හෝ වෙනත් කිසියම් ආයතනයක් පවත්වාගෙන යනවා නම් මේ ගැන ජනතාව දැනුවත් කිරීම ඔබේ වගකීමක්, වඩා ප්‍රායෝගිකව සහ සරළව දත්ත එකතු කරගන්නා මේ ක්‍රමය ගැන ඔබේ ආයතනයට පැමිණෙන අය දැනුවත් කිරීම, අදාළ QR Code එක නිසි පරිදි ප්‍රදර්ශනය කොට තැබීම සහ එය භාවිත කිරීමට පැමිණෙන සියලු දෙනාට දැනුම් දීම ඔබේ වගකීමක්. ඒ වගේම මහජනතාව වශයෙන් අපි හැමෝම මේ මොහොතේ අපේ පුරවැසි යුතුකම ඉටු කළ යුතුමයි. ඒ නිසා මේ අලුත්ම ප්‍රායෝගික වැඩපිළිවෙලට අපි හැමෝගෙම සහයෝගය ලබාදිය යුතුයි. රටක් වශයෙන් එක්ව කොරෝනා වෛරසය මැඩපැවැත්වීමට පුරවැසියන් ලෙස අපි අපේ වගකීම් ඉටුකරමු.
