2020 May 21
වෛරසයකින් හැදෙන, මදුරුවකුගෙන් බෝ වන, මාරාන්තික රෝගයක් තමයි ඩෙංගු. වෛරස් ප්‍රභේද හතරකින් තමයි ඩෙංගු බෝ වෙන්නේ. අධික උණ වගේ ඇඟේ පතේ වේදනාව ප්‍රධාන රෝග ලක්ෂණ ලෙස දක්වන්න පුළුවන්. බොහෝ දෙනාගේ අවධානය මේ වන විට යොමු වී තිබෙන්නේ කොවිඩ් වෛරසය වෙත කියක එක හැමොම දන්න කාරණාවක්. ඒත් පවතින වැසි තත්ත්වයත් සමග ඩෙංගු රෝගය ව්‍යාප්ත වීමේ ප්‍රවණතාවයක් පවතින බව සෞඛ්‍ය අංශ පෙන්වා දෙනවා. පිරිසිදු වතුරේ බිත්තර දමන ඊඩිස් ඊජිප්ටයි නමැති මදුරු විශේෂයෙන් ඩෙංගු වෛරසය බෝ වෙන අතර 2019 වසරේදී ඩෙංගු රෝගින් 105,049 ක් වාර්තා වූ අතර මෙම වසරේ ගෙවුණු මාස හතර හමාරක කාලය තුළ මෙරටින් වාර්තා වී ඇති ඩෙංගු රෝගීන් ගණන 19,446 ක්. 2019 දී ඩෙංගු මරණ 157 ක් වාර්තා වූ අතර මෙම වසරේ මේ දක්වා වාර්තා වී ඇති ඩෙංගු මරණ ගණන 20 ක්. මේ වන විට ඩෙංගු රෝගීන් වැඩි වශයෙන් වාර්තා වෙමින් ඇත්තේ කොළඹ,ගම්පහ, කළුතර,ගාල්ල, මාතර, රත්නපුර, කෑගල්ල, කුරුණෑගල, මාතලේ සහ මහනුවර යන දිස්ත්‍රික්කවලින්.
සෞඛ්‍ය අංශ පවසන්නේ පසුගිය සතියේ ආරම්භ වූ වැසි තත්ත්වය හේතුවෙන් ඩෙංගු ව්‍යාප්තියේ වර්ධනයක් අපේක්ෂා කළ හැකි බවයි. ඩෙංගු මඳුරුවන් බිත්තර දමන පිරිසිදු ජලය ටයර්, තැඹිලි කෝම්බ, ප්ලාස්ටික්, පොලිතින් හා පොල්කටු තුළ එක්රැස් විය හැකි බැවින් ඔබ ඒ ගැන සැලකිලිමත් විය යුතු වන අතර වැහි පීළි,ස්ලැබ්, ඉදිකිරීම් ස්ථාන හා වැඩ අවසන් නොකළ ගොඩනැගිලි වලද ජලය එක්රැස් වීම වැළැක්විය යුතු වෙයි.ඩෙංගු මදුරුවාගේ සීග්‍රයෙන් වෙනස් වන අනුවර්තන ලක්ෂණත මෙම රෝගයේ සීග්‍රයෙන් වෙනස් වන රෝග ලක්ෂණත් නිසා රෝගය පාලනය කිරීමත්, රෝගය හඳුනා ගැනීමත් අභියෝගයක් වී තිබෙනවා.මෙය වයිරසයක් මගින් බෝවන රෝගයක් වන අතර ආසාධිත මදුරුවකු වාහකයෙක් ලෙස ක්‍රියා කරනවා.වයස අවුරුදු 70ට වැඩි වයෝවෘද්ධ පුරවැසියන්, නිධන්ගත රෝග වලින් පෙලෙන්නන් හා අනෙකුත් දුබල අය රෝග ලක්ෂණ කිසිවක් හෝ උණ ගැනීමක් ඇති වුවහොත් හෝ වහාම වෛද්‍ය ප්‍රතිකාර ලබා ගැනීමට යොමු වන්න.
කොවිඩ්-19 වසංගත තත්ත්වය පාලනය සඳහා සෞඛ්‍ය හා ආරක්ෂක අංශ දැඩි පරිශ්‍රමයක් දරන මොහොතක ඩෙංගු බෝවීම වළක්වාගැනීම සඳහා පූර්ණ සහාය දීම ඔබ සතු වගකීමක්.
