ස්වභාවික රුව රකින්න හොඳම ඖෂධය මීපැණි …

By

ලස්සනට ඉන්න, පැහැපත් සමක් ලබාගන්න අකමැති කවුද..? ඕනම කෙනෙක් කැමති තමන් වඩාත් සුන්දරව පිටතට පෙන්වන්න. ලස්සනයි කියන සාධකය සාපේක්ෂ දෙයක් කියන එක ඇත්තක් වුනත්, ඕනෑම පුද්ගලයකුට ආවේණික සුන්දරත්වයක් තිබෙනවා. ඒ සුන්දරත්වය නිසි ලෙසින් පවත්වාගෙන යෑම ගැනයි අපි මේ තොරතුරු ගෙන එන්නේ.

සුන්දරත්වය රැකගැනීමේ ක්‍රියාවලියේදී කොටස් ගණනාවක් තිබෙනවා. පිටතට ඔබව පෙනෙන ආකාරය, ඒ කියන්නෙ ඔබේ භාහිර රූපය කියන්නෙ ඉන් එකක් පමණයි. නමුත් ඔබව දකින ඕනෑම කෙනෙක් මුලින්ම නිරීක්ෂණය කරන්නෙත් මේ පිටතින් දකින රූපය වන නිසාම අපි ඒ ගැන සැළකිලිමත් විය යුතුයි.

එදිනෙදා ජීවිතයේ අපි පාවිච්චි කරන, නිවසේ නිතරම වගේ තිබෙන දෙයක් ඔබේ රුව රැකගැනීමට භාවිතා කරන ආකාරය ගැන අද gasma.lk මගින් ඔබව දැනුවත් කරන්න අපි අදහස් කළා.

මොකක්ද මේ රහස් ඖෂධය..?

සරළව කිවුවොත් මේක රහසක් නොවෙයි. අපි ඉතා හොඳින් දන්නා මීපැණි ගැනයි අපි මේ කතා කරන්න යන්නෙ. නමුත් මීපැණි මගින් කළහැකි රුව රැකගැනීමේ මැජික් එක ඔබට රහසක් වූවාට සැක නැහැ.

අපේ සම දිනපතා අපවිත්‍ර වනවා. විශේෂයෙන්ම සමේ මැරුණු සෛල සම මතම තැම්පත්ව තිබීම සහ පිටතින් සම මත රැඳෙන කුණු දූවිලි හේතුවෙනුත් මෙලෙස සම අපවිත්‍ර විය හැකියි. ඔබ පාවිච්චි කරන සබන් හෝ Facewash භාවිතා කිරීම මගින් මුහුණ සේදීමෙන් පමණක් ඔබේ සම පිරිසිදු වන්නේ නැහැ. ඒ වෙනුවෙන් ඔබ සම හොඳින් Clenser කළ යුතුයි. මීපැණි කියන ස්වභාවික ඖෂධය වැදගත් වන්නෙ එතැනදීයි. මීපැණි ඔබේ සම මත ස්වභාවික ක්ලෙන්සර් එකක් ලෙස ක්‍රියා කරන බව ඔබ බොහෝවිට නොදැන සිටියා විය හැකියි. නමුත් නිතරම ඔබේ නිවසේ තිබෙන මේ මී පැණි භාවිතයෙන් ඔබට ඔබේ සම සම්බන්ධයෙන් තිබෙන ගැටළු රැසක් විසඳා ගැනීමට හැකියාව තිබෙන බව ඇසුවොත් පුදුම වේවි.

මීපැණි මගින් සමට කෙරෙන ප්‍රතිකාර මොනවාද…?

මුහුණ සේදීමට ඔබ විවිධ අලේපන වර්ග භාවිතා කරනවා නේද..? නමුත් ඒවා 100% ස්වභාවිකද සහ සමට හිතකරද කියන කාරණය ගැටළුවක්. නමුත් මිපැණි කියන්නෙ අතිශය ස්වභාවික වගේම ඖෂධීය ගුණ සහිත දෙයක්. අනිකුත් සියළු ක්‍රම අතරේත් සතියකට වරක් හෝ දෙවරක් මීපැණි යොදා මුහුණ සෝදන්න. වඩාත් සිනිඳු සහ ලප කැළැල්වලින් තොර සමක් ලබා ගැනීමට ඔබට හැකිවේවි.

ඒ වගේම තක්කාලි කියන්නෙ කෑමට ගන්නවා තරම්ම රුව රැක ගැනිමේ ක්‍රම වෙනුවෙනුත් පාවිච්චි කළ හැකි දෙයක්.මී පැණි සහ තක්කාලි එකට ගෙන අඹරා ඝණ මිශ්‍රණයක් සකස් කරගන්න. ඒ මිශ්‍රණය ඔබේ සම මත මිනිත්තු 15 – 20 පමණ කාලයක් ආලේප කර තබා ඉන්පසු සාමාන්‍ය වතුරෙන් සෝදා හරින්න. ඔබේ සමට අවශ්‍ය තෙතමනය ලැබී පැහැදිලි, දීප්තිමත් සමක් ලබා ගැනීමට ඔබට හැකිවේවි.

අපි කලින් සඳහන් කළා වගේම කිසිවක්ම මිශ්‍ර නොකරන ලද මී පැණි කියන්නෙ ඉතා වටිනා ඖෂධයක්. එලෙස මීපැණි ඔබේ මුහුණේ ආලේප කර විනාඩි 10කට පමණ පසු මද රස්නය සහිත ජලයෙන් සෝදා හරින්න. ඔබේ සමට අවශ්‍ය තෙතමනය ලබාදී සම වියළි සහ ඉරිතැළුණු ස්වභාවයට පත්වීම වළක්වනු ඇති.

රාත්‍රියේ නින්දට යාමට පෙර මුහුණ පිරිසිදු කර මී පැණි ස්වල්පයක් ආලේප කරන්න.මිනිත්තු 15කට පමණ පසු මද රස්නය සහිත ජලයෙන් සෝදා දමන්න. සම එල්ලා වැටීම සහ වයස්ගත වීම පාලනය කර ගැනීමට ඔබට හැකියාව ලැබේවි.

රෝස වතුර කියන්නෙත් අතීතයේ පටන් ස්වභාවිකව රුව රැකගැනීමේ ප්‍රතිකාර වලට භාවිතා කළ දෙයක්. මී පැණි කෝප්ප ¼ කට රෝස වතුර හැඳි තුනක් පමණ දමා හොඳින් මිශ්‍ර කර සාදාගත් මිශ්‍රණය මුහුණේ ආලේප කර විනාඩි 15ක් පමණ තබා සිසිල් ජලයෙන් සෝදා හරින්න. දිදුලන සමක් උරුම කරගැනීමට ඔබට හැකිවනු ඇති.

මීපැණි මේස හැන්දකට යෝගට් මෙස හැඳි 2,3ක් මිශ්‍ර කර හොඳින් කළවම් කර සාදාගත් මිශ්‍රණය මුහුණේ ආලේප කරන්න. මිනිත්තු 20ක් පමණ තිබෙන්නට හැර සිසිල් ජලයෙන් සෝදා හරින්න. ඔබේ සමේ වියපත් අවපැහැ ස්වභාවය නැතිවී ගොස් වඩා දීප්තිමත් සමක් ලබාගැනීමට ඔබට හැකිවේවි.

සම සඳහා විතරක්ම නෙමෙයි. මේ වටිනා ඖෂධය ඔබේ හිසකෙස් වලටත් ප්‍රතිකාරයක් ලෙස භාවිතා කළ හැකියි.

ඔබේ හිස කෙස් සේදූ පසු conditioner එකක් ලෙස හිසකෙස් මත මී පැණි ආලේප කර සෝදා හරින්න. සිනිඳු හා දිදුලන කෙස් කළඹක් ලබාගැනීමට මේ ප්‍රතිකාරය වැදගත් වනු ඇති.

මී පැණි සහ ඔලිව් තෙල් සම ප්‍රමාණයෙන් ගෙන මිශ්‍රණයක් සකස් කරගන්න. එය හිස කෙස් මත අතුරා පැයක් පමණ කාලයකට පසු හොඳින් සෝදා හරින්න. හිස කෙස් සවිමත් වීමට මෙය උපකාරී වේවි.

ඔබේ නිවසේ නිතරම සොයාගත හැකි මීපැණි වලින් ඔබේ පිටත පෙණුම කෙතරම් වෙනස් කරගත හැකිදැයි ඔබට අදහසක් ලැබෙන්නට ඇති. අපි අවට පහසුවෙන් සොයාගත හැකි ද්‍රව්‍ය භාවිතා කරමින් ස්වභාවිකවම රූපය රැකගැනීම කළ හැකියි. ඒ වගේම එමගින් අතුරු ආබාධ ආසාදන වැනි කිසිවකින් ඔබට කරදර වන්නේත් නැහැ. අනවශ්‍ය වියදම් වගේම අවදානමිනුත් වළකිමින් හැකි තරම් ස්වභාවික ක්‍රම අනුගමනය කරන්න යැයි අපි ඔබට යෝජනා කරනවා.

ටෙක් Lover කෙනෙක්ට නත්තලට දෙන්න හොඳම තෑගි…

By

editor

නත්තල් කාලෙයි අළුත් අවුරුද්දයි එක්ක ටෙක් ගැජට් වලට කැමති යාළුවෙක් එහෙමත් නැත්නම් පවුලෙ කෙනෙක් වගේ ඉන්නවනම් එයාට තෑග්ගක් තෝරගන්න ඔයාට ටිකක් අපහසු වෙන්න පුලුවන්. ඒ වගේම ඔයා වැඩිය තාක්ෂණය පැත්තට බර නැති කෙනෙක් නම් මේ වැඩේ ටිකක් සංකීර්ණයි. ඉතින් මේ තියෙන්නේ එළඹෙන උත්සව කාලෙදි Tech Lover කෙනෙක්ට දෙන්න පුලුවන් තෑගි කිහිපයක්. මෙතන සඳහන් කරල තියෙන හැම Item එකක්ම වගේ ලංකාවෙ ගොඩක් තැන්වලින් මිලට ගන්න පුලුවන් වගේම රුපියල් 5000ට අඩුවෙන් හෝ ඊට ආසන්න මුදලකට මිලදී ගන්න පුලුවන්.

Wireless Earbuds

නිතරම සින්දු අහන්න කැමති කෙනෙක්ට දෙන්න පුලුවන් හොඳම තෑග්ගක් තමයි මේක. මේ ගැජට් එක ගැන හැඳින්නුවොත් මේක සාමාන්‍ය EarPhone එකක් වගේම තමයි ඒත් වයර් නැතුව Bluetooth හරහා මේක වැඩ කරන්නෙ. මේ වගේ Wireless Earbuds වෙළඳපොලේ රුපියල් 1000 වගේ ඉඳලා 50,000 වගේ වෙනකල් මිලදී ගන්න පුලුවන්. ඒ වුනාට Noise Cancellation වගේ පහසුකම් නැති Chinese Brand වලට අයිති හොඳ සවුන්ඩ් කොලිටි එකක් සහ බැට්‍රි ලයිෆ් එකක් තියෙන Wireless Earbuds එකක් රුපියල් 4000ත් 5000 ත් අතර මුදලට ලේසියෙන්ම හොයාගන්න පුලුවන්.

Smart Wristband

තාක්ෂණය වගේම සෞඛ්‍ය ගැනත් හිතන කෙනෙකුට දෙන්න හොඳම තෑග්ගක් තමයි මේ Smart Wristband එකක් කියන්නේ. සාමාන්‍යයෙන් රුපියල් 4000-7000 ත් අතර වගේ ගාණකට හොඳ Smart Wristband හොයාගන්න පුලුවන්. මේ හරහා Heart Rate එක, රුධිරයේ ඔක්සිජන් තත්ත්වය, දවසකට ඇවිදපු පියවර ගාන ඇතුලු සෞඛ්‍ය සම්බන්ධ ගොඩක් දේවල් වගේම ‍ෆෝන් එකට Connect කරල Call Answer කරන්න, SMS බලන්න වගේ දේවලුත් කරන්න පුලුවන්.

Power Bank

මේ කාලෙ නිතරම ලයිට් යන නිසා අඩු බැටරි කැපෑසිටි එකක් තියෙන ෆෝන් එකක් අයිතිකෙනෙකුට ගොඩක් වටින ගැජට් එකක් තමයි පවර් බෑන්ක් එකක් කියන්නෙ. වෙළඳපොලේ පහසුවෙන්ම හොයාගන්න පුලුවන් වුනාට පවර් බෑන්ක් එකක් තෝරගන්න ගියාම ගොඩක්ම ලේසියෙන් ස්කෑම් වලටත් අහුවෙන්නනම් පුලුවන්. පවර් බෑන්ක් එකක් ගන්නකොට 10,000mAh හෝ ඊට වැඩි කැපෑසිටි එකක් තියෙන පවර් බෑන්ක් එකක් ඕනෙ කෙනෙක්ට ගැලපෙනවා. ඒ වගේම පවර් බෑන්ක් එකක් ගනිද්දි හොඳ වගකීමක් දෙන විශ්වාසවන්ත තැනකින් විශ්වාසවන්ත බ්‍රෑන්ඩ් එකකින් ගන්නත් කටයුතු කරන එකනම් නුවණට හුරු වැඩක්.

LED Light Strips

මේක නම් ගොඩක්ම ටෙක් පැත්තට බර නොවුනත් Teenager කෙනෙක්ට වගේ ගොඩක්ම ගැලපෙන Gift එකක්. Room එක ලස්සන කරගන්න, තමන් වැඩ කරන මේසෙ ලස්සන කරගන්න වගේම TikTok, Youtube වගේ කරන කෙනෙක්ට ලස්සන Background එකක් හදාගන්නත් RGB Light Strips ගොඩක් උදව් වෙනවා. මේ Light Strips සාමාන්‍යයෙන් රුපියල් 1000ත් 3000ත් අතර මුදලකට ලංකාවෙ ගොඩක් තැන්වලින් මිලදී ගන්න පුලුවන්.

USB Type C Dongle

දැන් එන ලැප්ටොප්, ෆෝන් හැම එකකම වගේ අනිවාර්යයෙන් දකින්න පුලුවන් Port එකක් තමයි USB-Type C කියන්නෙ. ඉතින් මේ Type C Port එකේ තියෙන විශේෂත්වය තමයි මේ හරහා HDMI, USB වගේ සිග්නල් ‍වර්ග ගොඩක් Out කරගන්න පුලුවන් එක. ඉතින් මේ USB Type C Port එකේ මේ සඳහන් කරපු m%fhdackh ගන්න මේ විදිහෙ Type C Dongle එකක් ඕනෙ වෙනවා. කලින් සඳහන් කරපු විදිහට මේ වගේ Dongle එකක් Student කෙනෙක්ට වගේ ගොඩක් m%fhdackවත් වෙනවා Projector වලට සම්බන්ධ කරන්න, USB Flash Drive Plug කරන්න වගේ දේවල් වලට.

අතේ ඇති ගානට නත්තල සමරන්න කියාපු තැන් කිහිපයක් මෙන්න…

By

editor

කොච්චර වයසට ගියත් නත්තල සමරන්න අපිට තියෙන ආසාවේ නම් අඩුවක් වෙන්නේ නැහැ. මෙදා සැරේ නම් නත්තල සමරන්න මුදල් ප්‍රශ්නය බොහෝදෙනෙක්ට බලපාලා තියෙනවා. ඉතින් අත මිට සරු නැති වුණත් අඩු මුදලින් සරුවට නත්තල සමරන්න යන්න හොඳම තැන් ලැයිස්තුවක් තමයි මේ.

Shopping

1. C-MAX Christmas Festival (food and shopping)

C-MAX Christmas Festival කියන්නේ අඩු මුදලින් නත්තල සමරන්න shopping කරන්න තියෙන ලොකුම festival වලින් එකක් කිව්වොත් හරි.

JOY community එක C-max Channel, Lassana Flora, VIP insurance සහ තවත් ආයතන කිහිපයක් සමඟ එකතුවෙලා මේ festival එක සංවිධානය කරලා තියෙනවා. නොයෙකුත් මාදිලියේ වෙළෙදුන්, තරඟ වගේම Zero Music Band එකත් සමඟ සජිත ඇන්තනී, රිද්ම වීරවර්ධන සහ කාංචනා අනුරාධිගේ සංගීත අත්දැකීමක් මෙහිදී ලබාගන්න පුළුවන්.

දිනය – 2021 දෙසැම්බර් 25, සෙනසුරාදා

වේලාව – ප.ව. 5.00 – ප.ව. 11.30

ස්ථානය – Arcade Independence Square, Independence Square, Colombo, Sri Lanka

අමතන්න : 071 896 9523

2. Annual Christmas Bake Sale

අඩු මුදලකට ඔයාගේ නත්තල රසවත් කරන්න sugar shack සූදානමින් ඉන්නවා. නත්තලට ගැලපෙන්න සරසපු රසවත් නැවුම් කේක් , කප් කේක්, කුකීස් , බ්‍රවුනිස් වගේම නත්තලට තෑගි දෙන්න සහ 25 වෙනිදාට ඔයාගේ නත්තල් කෑම මේසය සරසා ගන්න සාම්ප්‍රධායික Christmas Cake, Breudher & Yule Logs මෙහිදී ඔයාට ලබාගන්න පුළුවන්.

දිනය – 2021 දෙසැම්බර් 24

වේලාව – පෙ .ව. 10:30– ප.ව. 5:00

ස්ථානය – No. 20, de Fonseka Road, Colombo 5

අමතන්න : 0114 331 565

Christmas Meals

1. Christmas Eve Brunch සහ Christmas Dinner at The Admiral

සාක්කුවට නොදැනෙන්න ඔයාගේ Christmas Eve Brunch එක ගන්න ඕනේ නම් යන්න හොඳම තැන තමයි The Admiral.

ඔයාගේ budget එකට ගැලපෙන්න Christmas Eve dinner එකක් The Blue Water hotel එකේ The Admiral වෙතින් සූදානම් කරලා තියෙනවා. ඊට අමතරව Rose, Red සහ White wine glass එකක් නොමිලේ ලබාගන්න පුළුවන්. වයස අවුරුදු 6 ට අඩු ළමුන් සඳහා ඇතුල්වීම නොමිලේ.

Christmas Eve Dinner

දිනය – 2021 දෙසැම්බර් 24

වේලාව – ප.ව. 7: 30 – ප.ව. 10:00

මිල – Rs. 5,000 (එක් පුද්ගලයෙකු සඳහා )

Christmas Brunch

දිනය – 2021 දෙසැම්බර් 25

වේලාව – පෙ .ව. 7: 30– ප.ව. 3:00

මිල – Rs. 4,800 (එක් පුද්ගලයෙකු සඳහා )

වෙන් කරගැනීම සඳහා – 0761 809 944 | 0760 897 112

2. Christmas dinners at Galadari

නත්තල් කෑම කියන්නේ කාටත් අතිවිශේෂ දෙයක්. Galadari හෝටලයෙන් මේ නත්තලට ඔයාට ගැලපෙන මුදලට Christmas Day Dinner එකක් ලබාගන්න අවස්ථාව ලබා දීලා තියෙනවා.

Christmas Day Dinner

Dinner Buffet at the Coffee Stop

මිල : රු. 4,250 වැඩිහිටියන් සඳහා

මිල: රු. 2,200 ළමුන් සඳහා

වෙන් කරගැනීම සඳහා : 0114 790 615

Budget Christmas dinners ගැන වැඩිදුර විස්තර දැනගැනීම සඳහා පිවිසෙන්න :

Christmas Dining in Colombo

Entertainment

1. Santa Chase

Hilton

සැන්ටා කියන්නේ ලොකු කුඩා කොයි කවුරුත් වයස් බේදයක් නැතුව දකින්න කැමති ආස කරන චරිතයක්. Hilton Colombo හෝටලයේ Lobby හෝ the Graze Kitchen එකට තනියම හෝ ඔයාගේ පොඩිත්තාවත් රැගෙන එන්න අමතක කරන්න එපා.

දිනය – දෙසැම්බර් 24 සහ 2021 දෙසැම්බර් 25

වේලාව – ප.ව. 7: 00– ප.ව. 9:00 (දෙසැම්බර් 24) ප.ව. 12:00– ප.ව. 3:00 (දෙසැම්බර් 25)

මිල – නොමිලේ

අමතන්න – 0112 492 492

2. Lydia and Tilaka

සංගීතය, නත්තල් සිරිය ලබාගන්න තියෙන හොඳම ක්‍රම වලින් එකක්. Lydia සහ Tilaka husband සහ wife දෙපල Hilton Colombo හෝටලයේ lobby එකේදී වයලීනයේ සහ බටනලාවේ මිහිරි නාදයෙන් ඔයාව නත්තලේ අසිරිය විදගන්න winter wonderland එකට රැගෙන යාවි.

දිනය – 25 දෙසැම්බර් 2021 දක්වා

වේලාව – ප.ව. 7: 00– ප.ව. 8:00

ස්ථානය – Lobby, Hilton Colombo.

මිල – නොමිලේ

අමතන්න – 0112 492 492

3. Choro Calibre

ඔයාගේ ආදරණීයයන් සමගින් drinks සහ dinner ලබා ගන්න අතරවාරයේ එයාලගේ මිහිරි කටහඬින් ඔයාගේ නත්තල ආදරණීය කරන්න මේ choir එක සුදානම් වෙලා ඉන්නවා.

දිනය: 24th දෙසැම්බර් 2021

වේලාව – ප.ව. 8:00– ප.ව. 8:30

ස්ථානය – Lobby, Hilton Colombo

මිල : නොමිලේ

අමතන්න : 0112 492 492

නිරෝගිමත් පිරිපුන් කෙස් කලඹක් ලබාගැනීමට ක්‍රම 3ක්…

By

editor

කාන්තාවකට හිමි රූ සපුවේ අලංකාරය ඔප්නංවන්නේ ඇයට හිමි වරලසයි.. රූපය ගැන උනන්දු වෙන සෑම කෙනෙකුම කොණ්ඩයටත් අවධානය යොමු කළ යුතුමයි.ඉතාමත් ලස්සන ඝන හිසකෙස් වලින් පිරි වරලසක් හිමි තැනැත්තිය ඕනෑම තැනක කැපී පේනවා.නිරෝගී ලස්සන කොණ්ඩයකට හිමිකම් කියන්නට මොන කාන්තාවද අකමැති නේද? .එහෙත් හිසකෙස් වලට ඇතිවන ගැටළු නිසාම කොණ්ඩයේ තිබෙන ආකර්ෂණීයභාවය හීනවී යන්න පුළුවන් .හිසකෙස් රැකගන්න එක ඒ තරම් ලේසි පහසු වැඩක් නොවන බව අපි හැමෝම දන්නවා .විශේෂයෙන්ම තරමක් දිග කොණ්ඩයක් තියෙන යුවතියන්ට හිසකෙස් ගැටලු නැතුව වුණත් තමන්ගේ කොණ්ඩය පරිස්සම් කරගන්න තරමක් වෙහෙස මහන්සියක් දරන්න සිදුවෙනවා .මෙසේ හිසකෙස් ආශ්‍රිත බොහෝ ගැටලු ස්වාභාවික සත්කාර වලින් නිරාකරණය කරගත හැකියි. හිසකෙස් අලංකරණයට මුළුතැන්ගෙයින් මෙන්ම ගෙවත්තෙන් ද වස විස නැති, අතුරු ආබාධ නැති ස්වාභාවික අමුද්‍රව්‍ය බොහෝමයක් සොයාගන්නට හැකි වුවද වර්තමානයේ දී කාන්තාවන් මෙම ක්‍රම වලින් ඈත් වී සිටිනු දක්නට ලැබෙනවා. ස්වභාවිකවම හිසකෙස් පෝෂණය කර අලංකාර කරන සත්කාර ක්‍රම අනුගමනය කර සුන්දර නිරෝගී කෙස් කළඹක් ලබා ගැනීමට උනන්දු වීමෙන් දිගු කාලීනව ස්වාභාවික සුන්දරත්වයක් හිසකෙස් වලට ලබා ගැනීමට හැකිවෙනවා.

තුනී බවෙන් තොර කෙස් කළඹකට උළුහාල් සත්කාරය…

උළුහාල් කියන්නේ ගෙදරදීම සාදාගත හැකි අත් බෙහෙතක්. ඔබට තියෙන්නෙ තුනී කොණ්ඩයක් නම් එහෙමත් නැත්තම් ඉක්මනින් කැඩෙන කොණ්ඩයක් නම් මේ ප්‍රශ්න වලට උළුහාල්වලින් ඉතාමත් ගුණදායක සහ හිතකර සත්කාරයන් කළ හැකියි . මුලින්ම උළුහාල් hairspray එකක් විදියට භාවිතා කරන්න පුළුවන් ආකාරයට සාදා ගත යුතුයි .

සාදාගන්නා ආකාරය

කුඩා භාජනයක් ගෙන එයට උළුහාල් දමා ඉන්පසු වතුර දමන්න. රැයක් පුරා පෙගෙන්නට ඉඩ හරින්න. ඊළඟ දවසේ උළුහාල් පෙඟුන වතුර විතරක් spray එකකට දමා කොණ්ඩය shampoo කරාට පස්සේ conditioner එකක් විදිහට කොණ්ඩෙට ස්ප්‍රේ කරන්න .එසේ ස්ප්‍රේ කර විනාඩි දහයක් පමණ කොණ්ඩය හොඳින් සම්භාහනය කරගන්න .පසුව ඇල් ජලයෙන් සෝදා හරින්න. මෙම සත්කාරය සතියකට තුන් පාරක් පමණ කිරීමෙන් වඩාත් හොඳ ප්‍රතිඵල ලබා ගත හැකියි .

කොණ්ඩය වැවීමේ වේගය දෙගුණ කරගන්න පුළුවන් කරපිංචා සත්කාරය

කරපිංචා වල අඩංගු පෝෂණය නිවැරදිව කොණ්ඩයට ලබා දීමෙන් අපේ කෙස්ගස් වර්ධනය වන වේගය වැඩි කරන්න හැකියාව තිබෙනවා.

කරපිංචා සත්කාරය සාදාගන්නා ආකාරය

කරපිංචා කොළ 20 ක ප්‍රමාණයක්

උළුහාල් මේස හැඳි එකක්

නෙල්ලි ගෙඩියක මදය කොටස පමණක්

මෙම සියල්ල තලපයක් වනතුරු හොඳින් කොටාගන්න. පසුව හිස්කබල පුරාම තුනීයට මෙම තලපය ආලේප කරගන්න. විනාඩි තිහක් පමණ තිබෙන්නට හැර වතුරෙන් පමණක් සෝදා හරින්න. සතියට දෙවතාවක් තුන් වතාවක් වගේ මාසයක් පමණ මෙම සත්කාරය කිරීමෙන් පැහැදිලි වෙනසක් දැකගත හැකි වේ.

නළල ආසන්නයේ හිසකෙස් ගැලවී යාම නවතාලීමට ඔලිව් තෙල්

නළල අවට හිසකෙස් වැටී යාමෙන් කාන්තාවන් බොහෝ අපහසුතාවන්ට පත් වෙනවා. එසේ වැටී යන හිසකෙස් නැවත වර්ධනය කරගන්න ඔලිව් තෙල් සත්කාරය සතියකට තුන් වතාවක් පමණ භාවිතා කරන්න.

ඔලිව් තෙල් සත්කාරය සාදාගන්නා ආකාරය

ඔලිව් තෙල් මේස හැඳි දෙකක් ගෙන එය සුළු වේලාවක් රත්කර ගන්න . රත් කරගත් ඔලිව් තෙල් නළල ආශ්‍රිත හිසකෙස්වල ගා හොඳින් සම්භාහනය කර ගන්න. පසුව විනාඩි පහළොවක් පමණ තිබෙන්නට හැර ඉතිරි වූ තෙල් යළිත් හිසේ තවරා විනාඩි පහළවක් තබන්න. ඉන්පසු සල්ෆෙට් අඩංගු නොවන ෂැම්පු වර්ගයක් දමා ඇල් ජලයෙන් සෝදා හරින්න.

ඔබත් කොණ්ඩයට ආදරය කරනවා නම් ඒ වෙනුවෙන් විශේෂ කාලයක් වෙන් කරගෙන මෙම සත්කාරයන් කිරීම සිදුකරන්න. අපි කොණ්ඩයට ආදරේ කරන තරමටම කොණ්ඩය ලස්සනට වගේම නිරෝගීව තබා ගන්නට හැකි වෙනවා.

අන්තර්ජාලය ඇසුරිනි

මන්දාකිනි පතිරණ .

මුහුණේ ඇතිවන ගැටළු වලට කදිම විසඳුම් මෙන්න …

By

editor

කාන්තාවකට හිමි රූ සපුවේ ඉතා වැදගත් කොටසක් ලෙස සම හැඳින්විය හැකිය. එය ශරීරයෙහි විශාලතම ඉන්ද්‍රිය ලෙස ද හැඳින්වෙයි.මේ නිසා රූපය ගැන උනන්දු වන සෑම කෙනෙකුම සමේ පැහැපත් බව සහ ආකර්ශනීය බව පිළිබඳ වැඩි අවධානයක් යොමු කළ යුතුය.හැමදාම ලස්සනට ඉන්න මොන කාන්තාවද අකමැති.වෙනදාමෙන් සිතූ පැතූ වෙලාවට විලාසිතාගාර වලට යන්නට බැරි නිසා බොහෝ කාන්තාවන්ගේ සමයෙහි එක් එක් ගැටළු මතු වෙන්නට පටන් අරන්.කාන්තාවකට හම කියන්නේ ඇය සතුව තිබෙන ලොකුම ආභරණයයි.ආකර්ෂණීය, පිරිපුන් ,පැහැපත් ,නිකැලැල් සමක් තියෙන කාන්තාව වාසනාවන්තියකි. මේ අතරින් මුහුණේ සම හරි විශේෂයි .මුහුණ දුර්වර්ණ වී ලප කැළැල් මතුවෙන්නට පටන් ගත්තොත් ඒ ගැන කාන්තාවන් බොහෝ විදිහට වද වෙනවා සහ සිත්තැවුල් ගන්නවා .

විශේෂයෙන්ම මුහුණේ සමට සත්කාර කිරීමේදී අප සෑම අතින්ම ප්‍රවේශම් විය යුතුයි. වෙළෙඳපොලේ තියන ක්ෂණිකව ලස්සන සුදු වෙන ආලේපන භාවිතා කිරීමෙන් නොදැනුවත්වම සම සුදුමැලි වී රැළි වැටෙන්නට පටන් ගන්නවා.

සම රැලි වැටී සුදු මැලි වූවායින් පසු ඔබ වයසට වඩා වයසයි වගෙයි පෙනෙන්නේ. එම නිසාම විශේෂයෙන්ම කාන්තාවන් මුහුණේ සමට සත්කාර කිරීමේදී අවධානය දිය යුත්තේ ඉක්මනින්ම ප්‍රතිඵල ලබා ගැනීමට නොව කලක් ගියත් හොදම ප්‍රතිඵලය ලබා ගැනීමටයි. පැහැපත් සමකට හිමිකම් කියන්නට සෑම කාන්තාවක් පාහේ ම කැමතියි.එහෙත් සමෙහි මතුවන ලප කැලැල්, කුරුලෑ ,රැලි වැටීම් ,සමේ වියළි බව මුළුමනින්ම නැති කරගන්නට ස්වභාවික දේවල් වලින් සත්කාර කළ හැකි.

මුහුණ සුසිනිදු කිරීමට කෝපි

මුහුණෙහි ඇතිවන ලප කැළැල් සහ අදුරු ස්වභාවයට කදිම විසඳුමක් තමයි කෝපි කියන්නේ. ඉහල කැෆෙන් අගයක් පවතින කෝපි කියන්නෙ රුපලාවන්‍ය කටයුතු සදහා යොදා ගන්නා අතිසාර්ථක ආලේපනයක්.වයසට ගියත් ලස්සනට ඉන්නයි කාන්තාවන් කැමති.වයස අවුරුදු 50 ඉක්මවා ගිය කාන්තාවන්ගේ ඇතිවන අඳුරු ලප කැළැල් මකා දමන්නට පවා කොපි ෆේෂල් වලට හැකියි. රුධිර ගමනාගමනය වැඩි කර සමෙහි දීප්තිය රැක දෙන කෝපි වලින් මුහුණේ ඇතිවන ගැටලු වලට කෝපි ෆේෂල් එකක් සහ ක්‍රීම් එකක් සාදා ගන්නා අකාරය ගැන ඔබට කියලා දෙන්නම්.

කෝපි ස්ක්‍රබ් සකස් කිරිම

අවශ්‍ය ද්‍රව්‍ය.

* කෝපි කුඩු මේස හැඳි 1ක්

* දුබුරු සීනි මේස හැන්දක්

* පිරිසිදු පොල් තෙල් හෝ ඔලිව් තෙල් මේස හැඳි 1 ක්

මේ සියල්ල එකතුකර මිශ්‍ර කරගන්න. ඔබේ මුහුණේ මැරුණු සම ඉවත්කර ගැනීම සඳහා මේ කෝපි ස්ක්‍රබ් එක භාවිතා කර ඇඟිලි තුඩු අගින් මුහුණ හොඳින් මසාජ් කළ පසු සෝදා හරින්න.එයින් ඔබේ මුහුණට නව දීප්තියක් ලැබෙයි.

කෝපි ෆෙස් මාස්ක්

අවශ්‍ය ද්‍රව්‍ය

* කෝපි කුඩු මේස හැදි 1 ක්

* නැවුම් කිරි හෝ යෝගට් මේස හැඳි 1ක්

* මී පැනි මේස හැදි 1 ක්

* කඩල පිටි මේස හැදි 1 ක්

* දෙහි බිංදු කිහිපයක්

මේ සියලු ද්‍රව්‍ය එකට එක්කර තලපයක් වන ලෙස හොඳින් මිශ්‍ර කර ගන්න. පසුව සම්පූර්ණ බෙල්ලෙ සහ මුහුණේ ආලේප කර විනාඩි විස්සක් පමණ සිටින්න. පසුව මද උණු වතුරෙන් සෝදා හරින්න. ඔබේ මුහුණේ ඇති අදුරු පැහැය දුරුකරගෙන ආකර්ෂණීය පැහැයක් ලබා ගැනිම සඳහා මසකට දෙවරක් මෙම කෝපි ෆේෂල් සත්කාරය සිදු කර එහි වෙනස වටහා ගන්න. මුහුණ සුසිනිදු කර පැහැපත් ස්වාභාවික වර්ණයක් සමට ලබාගත හැකි වේ.

ඇපල් කන්න වගේම ආලේපන කරන්නත් පුළුවන්.

දිනකට ඇපල් ගෙඩියක් ආහාරයට ගන්නවා හැරෙන්නට ඇපල් සතු පෝෂණ ගුණය සමෙහි පැවැත්මට දායක කරගන්න පුළුවන් තවත් ආකාරයක් වන්නේ ඇපල් සයිඩර් විනාකිරි රූපලාවන්‍ය සත්කාර සඳහා එක්කර ගැනීමයි. ඇපල් වල සාරයෙන් නිෂ්පාදනය කෙරෙන මෙම අපූරු ද්‍රාවනය සතු බැක්ටීරියා නාශක ගුණය හා සමීප එච්.පි අගය සමබර කිරීමේ හැකියාවත් නිසා සමේ ස්වාභාවික සුන්දරත්වය හා තරුණ පෙනුම රැකගන්න එය කදිම සංඝටකයක්.ඒ වගේම වියපත් වීමත් සමග සමෙහි හටගන්නා අඳුරු ලප කැළැල් අකා මකා දාන්නත් ඇපල් සයිඩර් විනාකිරි වලට හැකි.

දීප්තිය වඩවන නිල් කටරොළු

රුව රකින රහස් වට්ටෝරුවක් නිල් කටරොළු මලට හිමියි.ඉතා පහසුවෙන්ම සොයාගැනීමට හැකි නිසා භාවිතයටද ඉතා පහසුයි .විශේෂයෙන්ම සම වයස් ගත විම පාලනයට ආලේපනයක් ලෙස යොදා ගනු ලබයි. පර්යේෂණ මගින් සොයාගෙන ඇති අන්දමට නිල් කටරොළු මල් සතුව ප්‍රති ඔක්සිකාරක ගුණයක් පවති. සමෙ කොලැජන් වර්ධනය කර සම වයස් ගත විම වලක්වයි. තවද, මෙම නිල් පැහැති මල්වල ඇති බැක්ටීරියා නාශක ගුණය සමෙහි ඇතිවන කුරුලැ පාලනය කල හැකි ස්වාභාවික සත්කාරයකි. නිල් කටරොළු මල් සමට සිසිලක් ලාබා දෙන අතරම සම වියලීම වලක්වා සමෙ තෙතමනය ද ආරක්ෂා කරයි . සමෙ තෙතමනය ආරක්ෂා කරන අතර දිප්තිය වර්ධනය කරයි.

මෙම සත්කාරය සියල්ලම කරන අතරතුර ශරීර උෂ්ණත්වයද පාලනය කරන ආහාර ලබා ගැනිම ද බොහෝ වැදගත් බව මතක තබා ගත යුතුය. එසේම දිනකට වතුර ලිටර් 2 ක් පමණ පානය කිරිම වැදගත් වන අතර යහපත් සෞඛ්‍ය පුරුදු පවත්වාගෙන යාමද ඔබේ රූ සපුව වර්ධනයට ඉවහල් වේ.

අන්තර්ජාලය ඇසුරෙනි.

මන්දාකිනි පතිරණ .

ඔබට මෙන්ම ඔවුන්ටත් ඇති අයිතිය – ජාත්‍යන්තර සත්ව අයිතීන් සුරැකීමේ දිනය අදයි …

By

editor

ලෝකය අයිති වන්නේ මිනිසුන්ට විතරමද..?

අයිතීන් සුරැකිය යුත්තේ මිනිසුන්ගේ විතරමද…?

ලෝකය පුරා ක්‍රියාත්මක වන සත්ව අයිතීන් සුරැකීමේ සංවිධාන මේ ප්‍රශ්නය නිරන්තරයෙන් අසමින් සිටිනවා. නමුත්, කොතෙක් දුරට ප්‍රායෝගිකව මේ සත්ව අයිතීන් ආරක්ෂා වනවාද යන්න ගැටළුවක්.

මේ නිසාම ජාත්‍යන්තර සත්ව අයිතීන් සුරැකීමෙ දිනයක් සමත කරගෙන තිබෙන බව ඔබ දන්නවා ඇති. දෙසැම්බර් 10 වැනිදා, එනම් ලෝක මානව හිමිකම් දිනය යෙදෙන දවසේම මෙම සත්ව අයිතීන් සුරැකීමේ දිනයත් යෙදී තිබීම දෛවෝපගත යැයි කිව හැකියි.

ලෝකය පුරා සිටින සත්වවේදීන් මෙම සත්ව අයිතීන් ආරක්ෂා කිරීම වෙනුවෙන් දැඩි අනවරත අරගලයක නිරත වනවා.සතුන්ටද ඔබට මට මෙන්ම ජීවත් වීමේ අයිතිය තිබෙන බව පිළිගත යුතුයි.

ඔබට මෙන්ම ඔවුන්ටද ආහාර, ජලය සහ වාසස්ථාන සම්බන්ධයෙන් ඇති අයිතියට මිනිසුන් ලෙස අපි ගරු කරනවාද..? මෙය සැබෑම ගැටළුවක්.ලෝකය අයිති මිනිසුන්ට පමණක්ම යැයි සිතා හිතුමනාපයේ සත්ව අයිතීන් උල්ලංඝනය කිරීම ලෝකය පුරා සිදුවන්නක්.

වනාන්තර විනාශ කිරීම, ගිණි තැබීම ආදිය මගින් සෘජු ලෙස සත්ව අයිතීන් උල්ලංඝනය වනවා සේම ආහාර සහ ජල සම්පත් හිඟ වීමට මිනිස් ක්‍රියාකාරකම් බලපෑම මගින් වක්‍ර ලෙස සත්ව අයිතීන් උල්ලංඝනය වනවා.

සතුන්ට වේදනාව දැනෙන බව, හැඟීම් සහ දැනීම් තිබෙන බව සමහර විට මිනිසුන් වන අපට අමතකව යනවා. නමුත් ඒ සියල්ල මිනිසුන් මෙන්ම සතුන්ටද පොදු කරුණාවන් වනවා.

සතුන් ඔබේ සුරතලුන් ලෙස සිතීම තුළම ඔවුන්ගේ අයිතීන් උල්ලංඝනය වන බව සත්වවේදීන් පෙන්වා දෙනවා. ඔවුන් ඔබේ සුරතලුන් නොව ලෝකයේ ජීවත් වන ඔබ මෙන්ම සමාන ජීවී කොටසක් ලෙස නැතිනම් සමානයින් ලෙස සලකන ලෙස සත්වවේදීන් යෝජනා කරනවා.

මස් පිණිස, ලොම් පිණිස සහ සම් පිණිස සතුන් යොදා ගැනීම ලොකයේ අනාදිමත් කාලයක සිට සිදුවන්නක්. ලෝකයේ මිළ අධික පාරිභෝගික භාණ්ඩ අතරට මේ සත්ව සම් සහ ලොම් මගින් කළ නිෂ්පාදන ඇතුළත් වනවා. මෙය සත්ව අයිතීන් අමු අමුවේම උල්ලංඝනය වීමක් බව ලෝක සත්වවේදීන් පවසනවා.

ඒ වගේම විවිධ සෞඛ්‍යමය අත් හදා බැලීම් සඳහා සතුන් භාවිතා කිරීම තුළ ඔවුන්ගේ ජීවත් වීමේ අයිතිය අහිමි කිරීම සහ නිදහස සීමා කිරීම කෲර හිංසනයක් බව සත්වවේදීන් සඳහන් කරනවා.

අශ්වාරෝහක සංදර්ශන, සර්කස්, විවිධ විනෝදාත්මක ක්‍රීඩා සහ ආගමික ඇදහිලි වෙනුවෙන් ලෝකය පුරාම විවිධ සංස්කෘතීන්හි සතුන් භාවිතා කරනවා. මේවා සත්ව අයිතීන් උල්ලංඝනය වීම් ලෙස සැළකෙනවා.

මෙවැනි හිංසා කිරීම් සහ අයිතීන් උල්ලංඝනය කිරීම් නවතන ලෙස ලෝක ප්‍රජාවට බල කරමින් සෑම වසරකම දෙසැම්බර් 10 වැනිදා සත්ව අයිතීන් සුරැකීමේ දිනය ක්‍රියාත්මක වනවා.

එදිනට වීදි බසින සත්ව ලෝලීන් ඉටිපන්දම් දල්වමින්, සටන් පාඨ කියමින්, පුවරු ඔසවමින් සතුන් වෙනුවෙන් හඬ නගනවා. සත්ව ආහාර අනුභවයෙන් වැළකෙමින් නිර්මාංශ වීම මගින්ද ඇතැම් පිරිස් මෙම සටනට එක් වනවා.

PETA නැතිනම් People for the Ethical Treatment of Animals සංවිධානය සෑම වසරකම මේ සත්ව අයිතින් සුරැකීමේ දිනය වෙනුවෙන් ලෝකය පුරා විවිධ වැඩසටහන් සංවිධාන කරනවා. සියළු සත්ව ආහාර වලින් වැළකෙමින් මේ දිනය සැමරීමට එක්වන ලෙස ඔවුන් නිරන්තරයෙන් ජනතාව පොළඹවනවා. එමගින් සතුන් විශාල ප්‍රමාණයක ජීවිත බේරාගැනෙන බව එම සංවිධානය පවසනවා.

කෙසේනමුත් දියුණු ජන සමාජයක් ලෙස මිනිසුන්ට මෙන්ම සතුන්ටද, එක හා සමාන ලෙස ජීවත් වීමේ අයිතිය පවතින බව පිළිගත යුතුයි.
එහෙයින් වගකීම් සහගත පුරවැසියන් ලෙස හැකි සෑම විටම සත්ව අයිතීන් සුරැකෙන පරිදි කටයුතු කිරීම අප සැමගේ වගකීමක්.

තවදුරටත් සතුන් යනු මිනිසුන්ගේ ප්‍රදර්ශන භාණ්ඩ හෝ පරිභෝජන භාණ්ඩ ලෙස නොසිතන, ඔවුන්ද සමාන අයිතිවාසිකම් සහිත තවත් ජීවී ප්‍රභේද ලෙස සිතන ජන සමාජයක් නිර්මාණය වනදාක ජාත්‍යන්තර සත්ව අයිතීන් සුරැකීමේ දිනය සැබෑ ලෙසම අර්ථ ගැන්වෙනු ඇති.

අඟහරු මත ජනාවාස ඇති කරන්න සුදානම් වන – SpaceX …

By

editor

පෘතුවියෙන් එහා විශ්වය පිලිබඳ අධ්‍යනය කරන්න මිනිසුන්ට අභ්‍යවකාශය තරණය කිරීමට සිදුවෙනවා, ඒ සඳහා විද්‍යාඥයින් විසින් රොකට් යානා නිපදවීම සිදුකරනවා.ලෝව පළමු චන්ද්‍රිකාව වන ස්පුට්නික්-1 චන්ද්‍රිකාව අභ්‍යවකාශය වෙත ගෙනයාමේ සිට 1969 දී නීල් ආම්ස්ට්‍රෝන් සඳ මත පා තබන මෙහෙයුම දක්වා සිදු කරනු ලැබූ අභ්‍යවකාශ තරණයන් සඳහා රොකට් යානා භාවිතා කිරීම සිදු වුණා.

ක්‍රි.ව. 1200 කාලයේදී මෙම රොකට් යානා පිලිබඳ අහන්න ලැබුනත්, රොකට් යානාවක් ප්‍රථමයෙන් දැකගන්න ලැබෙන්නේ 1926 වර්ශයෙදී ය. කොහොම නමුත් කාලයත් සමග ඉතා වේගයෙන් මෙම රොකට් තාක්ෂණය දියුණු වීමෙන් මේ වන විට අපට Falcon 9, Electron, Atlas-V, New Shepard වැනි නවීන රොකට් යානා දැකගන්නට ලැබෙනවා.

රොකට් යානා භාවිතයෙන් චන්ද්‍රිකා අභ්‍යාවකාශගත කිරීම සිදු කළත් , මිනිසුන් අභ්‍යාවකාශ තරණය සිදු කළත් මෙම යානා වල ප්‍රධාන අවාසි 2 තිබෙනවා. ඒ තමයි ආරක්ෂාව සහ වියදම. ආරක්ෂාව ගැන කතාකරොත් මෙම රොකට් යානා බලගන්වන්න හයිඩ්‍රජන්,ඔක්සිජන් වැනි පිපිරෙනසුලු මූලද්‍රව්‍ය යොදාගැනීම හේතුවෙන් රොකට් යානා අනතුරු වාර්තා වෙලා තියෙනවා. චැලෙන්ජර් ශටල අනතුර කියන්නෙත් ඒ වැනි අනතුරක්.

ඒ වගේම තමයි රොකට් යානා නිපදවීමට හා භාවිතයට විශාල මුදලක් වැයවීම. උදාහරණයක් ලෙස මේ වන විට අන්තර්ජාතික අභ්‍යවකාශ මධ්‍යස්ථානයට ගගණගාමියෙකු පිටත් කිරීමට NASA ආයතනයට ආසන්න වශයෙන් ඇමරිකානු ඩොලර් මිලියන 100 කට ආසන්න මුදලක් වැයවෙනවා.

ඉතින් මේ වගේ අභ්‍යවකාශ තරණයන්ට විශාල වශයෙන් මුදල් වැයවීම අවම කරන්න ඉදිරිපත් වෙච්ච සමාගමක් තමයි SpaceX කියන්නෙ.

SpaceX

Elon Musk කියන්නෙ මේ වන විට ලෝව පොහොසත්ම පුද්ගලයෙක්. ඔහු විසින් නිර්මානය කරපු X.COM ( මේ වෙද්දි PayPal යනුවෙන් හඳුන්වන ) වෙබ් අඩවිය 2002 වසරේදී ඩොලර් බිලියන් ගනනකට අලෙවි කිරීමෙන් පසු ඔහු විසින් තවත් අළුත් සමාගම් දෙකක් නිර්මාණය කරනවා. ඒ තමයි Tesla සහ SpaceX කියන්නේ. වසර කිහිපයකට පසු ඔවුන් තමන්ගෙ පළමු රොකට් යානාව වන Falcon 1 පරික්ෂා කරනවා, අසාර්ථක උත්සහයන් 3 කට පසුව හතරවන උත්සහයෙදි ඔවුන් සාර්ථකව පෘතුවි කක්ෂයට පිවිසෙනවා. කෙසේවෙතත් මෙම හතරවන Falcon 1 දියත් කිරීමෙන් අනතුරුව ඔවුන් Falcon 1 රොකට්ටුව භාවිත කිරීම නවත්වනවා.

2010 වසරේදී SpaceX, Falcon 9 රොකට් යානය සමග නැවත කරළියට එනවා. මෙම Falcon 9 රොකට් යානය පරීක්ෂණ ගණනාවකට ලක් කිරීමෙන් අනතුරුව රොකට් යානය නැවත භාවිත කල හැකි ලෙස නිපදවා තිබෙනවා. SpaceX විසින් Falcon 9 රොකට් යානය භාවිත කිරීම සිදු කරන අතර ඔවුන්ට මෙම යානයේ මුල් කොටස් 10 වතාවක් දක්වා නැවත භාවිත කිරීමට සමත් වෙලා තියෙනවා.

Starship

SpaceX ආයතනයෙන් Falcon 9 Rocket යානය මුල් කොටස First Stage එක නැවත භාවිත කරන්න හදල තිබුනට Falcon 9 රොකට් යානයේ දෙවෙනි කොටස නැවත භාවිත කිරීමට හැකියාවක් නැහැ. Falcon 9 රොකට් යානය භාවිතා වනුයේ පෘතුවිය අවට කක්ෂ වලට (කිලෝමීටර් 2000-30,000) භාණ්ඩ ප්‍රවාහනය කිරීමටයි. නමුත් Falcon 9 Rocket යානයට පෘතුවියෙන් එපිට ස්ථාන වලට භාණ්ඩ ප්‍රවාහනය කිරීම තරමක් අපහසුයි. මෙම හේතු නිසා SpaceX ආයතනයෙන් මේ වන විට අඩුපාඩු මගහැරගෙන “Starship” නමින් නවතම රොකට් යානාවක් නිෂ්පාදනය කරමින් පවතිනවා.

StarWars කතාමාලාවෙ එන Starship එක මුල් කරගෙන තමයි මේ රොකට් එකට නම දාල තියෙන්නේ. ඉතින් මේ Starship යානය හදල තියෙන්නේ සම්පූර්ණයෙන්ම නැවත භාවිතා කිරීමට හැකි අයුරින්. ඒ අනුව මෙම රොකට් යානයට පෘතුවි වායුගෝලයෙන් සහ ගුරුත්වාකර්ෂණයෙන් ඉවත් වී යාමට හැකි විශාල බලයක් තිබෙන පලවෙනි කොටස හා අභ්‍යවකාශයේ දී ගමන් කිරීම සහ භාණ්ඩ ප්‍රවාහනය, ගබඩාකිරීම වැනි දැ කරන දෙවෙනි කොටස ( First Stage & Second Stage ) යන කොටස් දෙකම මේ Starship යානයෙදි නැවත භාවිත කිරීමට හැකි ලෙස නිෂ්පාදනය කර තිබෙනවා.

මෙහි ඇති වැදගත් කරුණ වනුයේ Starship යානයට පෘතුවියෙන් එහා තියෙන ග්‍රහලෝක වලට වුවත් ගමන් කිරීමට හැකි වීමයි. එවැනි ග්‍රහලෝක අතර කරන ගැඹුරු අභ්‍යවකාශ ගමනකට ඉන්ධන අධික ලෙස අවශ්‍ය වෙනවා. සාමාන්‍යයෙන් රොකට් යානයක් පෘතුවි වායුගෝලයෙන් සහ ගුරුත්වාකර්ෂණයෙන් ඉවතට යාමට විශාල ඉන්ධන ප්‍රමාණයක් භාවිතා කරනවා. ඉතින් නැවත භාවිත කරන්න පුලුවන් Starship වගේ යානයක් වෙනත් ග්‍රහලෝකයකට මෙහෙයුමක් කිරීමේදී එම ග්‍රහලෝකය වෙත යාමට හා නැවත පෘතුවියට පැමිණීමට විශාල ඉන්ධන ප්‍රමාණයක් භාවිතා කරනවා. මෙවැනි මෙහෙයුමක දී Starship යානයට පෘතුවි කක්ෂයකට ගොස් එහි නැවතී Tanker ලෙස හඳුන්වන Starship වර්ගයෙන් Starship එක නැවත Refuel කරගන්න හැකියාව තියෙනවා. ඉතින් දැනට ගණනය කරල තියෙන විදිහට පෘතුවි කක්ෂයෙදි නැවත Refuel කරපු Starship එකකට පුලුවන් චන්ද්‍රයා මතට මිනිස්සුන්ව රැගෙන ගොස් ආපසු පෘතුවියට විත් ගොඩබැමටත්.

ඇයි මේක වැදගත් වෙන්නෙ ?

Starship | Earth to Earth

දැන් ඔයාලා අහයි මේක තවත් එක රොකට් එකක්නෙ, ඇයි මේක සාමාන්‍ය මිනිසුන්ට වැදගත් වෙන්නෙ කියලා? එලෝන් මස්ක් කියන විදිහට මේ Starship එක හදන එකේ ප්‍රධාන අරමුණ තමයි අඟහරු වල මිනිස් ජනාවාස ඇති කරන එක. මොකද දැනට පෘතුවියෙ මිනිස්සු කරන බොහෝ ක්‍රියාකාරකම් නිසා ළඟදීම දවසක පෘතුවියෙ ජීවත් වෙන්න බැරිව යනව කියන එක තමයි එයාගෙ අදහස. ඉතින් මේ විදිහට අඟහරු වගේ වෙනත් ග්‍රහලෝකයකට මිනිස්සුන්ව සහ භාණ්ඩ ප්‍රවාහනය කරන එක හැරුනම මේ Starship එකට කරන්න පුළුවන් තවත් දෙයක් තමයි පෘතුවියෙ තැන් දෙකක් අතර ප්‍රවාහනය සිදුකරන එක.

ඉතින් SpaceX ආයතනයෙන් ඉදිරිපත් කරල තියෙන වීඩියෝ වලට අනුව ගුවන්තොටුපලක් වගේ තැනක මිනිසුන්ට ලේසියෙන්ම Starship එකට ඇතුල් වෙලා ලෝකෙ ඕනෙම තැනකට විනාඩි තිහක් වගේ ගොඩක් පොඩි කාලයක් ඇතුලත ගමන් කරන්න හැකියාව තියෙනවා.

Starship එකේ අනාගතය

ඉතින් දැන් තියෙන තාක්ෂණය එක්ක මේ වගේ ගොඩක් වැඩ කරන්න පුළුවන් රොකට් යානයක් හදන්න පුළුවන් ද කියලා හිතෙයි. ඇත්තටම මේ වෙද්දි SpaceX ආයතනයෙන් Starship එකේ පරීක්ෂණ විශාල ප්‍රමාණයක් කරල තියෙනවා. ඒ වගේම අපිට මේ වෙද්දි Starship පරීක්ෂණ යානා 7 ක් මීටර් 150 ක් සහ කිලෝමීටර් 10 වගේ උසවල් වලට පියාසර කරල තියෙනවා බලාගන්න පුළුවන්. දැනට තියෙන ආරංචි මාර්ග අනුව අපිට මේ Starship යානයේ පළමු අභ්‍යාවකාශ ගමන ලබන වසරේ මුල් කාලයේදී දැක බලා ගැනීමට හැකියාව තිබෙනවා.

ඊට අමතරව මේ වන විට NASA ආයතනයෙන් සැලසුම් කරල තියෙන Artemis 2024 කියන සඳ ගමනේදී, සඳ මතට ගොඩබෑම සිදුකරන්න Starship යානයේ තවත් එක ආකෘතියක් වෙන Starship HLS යානය භාවිතා කිරීමට තීරණය කරල තියෙනවා. එතකොට අපිට ඒ ගමනත් 2023 සහ 2024 වගේ වර්ශවලදී බලාගන්න ලැබෙනවා.

ධනංජය පසන්

ගෘහස්ථ ගෑස් සිලින්ඩරය ගැන අපි හරියටම දැනුවත්ද?

By

editor

ගෑස් කියන්නේ මේ දවස් වල හැමෝම කතාබහ කරන මාතෘකාවක්. ගෑස් නොමැති වීම ගැන බොහෝ දෙනා හඬ නගන අතරේම මේ ගෑස් සම්බන්ධ විවිධ ප්‍රවෘත්තිත් තැනින් තැන අසන්නට ලැබුනා ඔබට මතක ඇති. මුළුතැන්ගෙයි භාවිතා කරන ගෑස් උඳුන් කාන්දු වීම හේතුවෙන් සිදුවූ පුපුරා යාම් කිහිපයක්ම මේ පුවත් අතර තිබුනා. පසුගියදා කොළඹ Racecourse ගොඩනැගිල්ලේ පිහිටි අවන්හලක සිදුවූ ගෑස් කාන්දුවක් හේතුවෙන් විශාල පිපිරීමක් සමග ගින්නක් පවා හටගෙන තිබුනා. ඇතැම් මාධ්‍ය මේ සිදුවීම් සහ ගෑස් හිඟ බව අතර සම්බන්ධයක් ගොඩනගන්නත් උත්සාහ කොට තිබූ අයුරු බොහෝවිට ඔබ අසා තිබෙනවත් විය හැකියි. ගෑස් වල තත්වය බාල කොට වෙළඳපොළට නිකුත් කිරීම හේතුවෙන් දිගින් දිගටම මෙවැනි පිපිරීම් ඇතිවන බව එවැනි වාර්තා වලින් කියවුනා. මේවායේ ඇත්ත නැත්ත කෙසේ වෙතත් අවසානයේ ගෑස් කාන්දු වීම හේතුවෙන් අවාසනාවන්ත ලෙස සිදුවූ පුපුරා යාම් කිහිපයක්ම අපට අසන්නට ලැබුනු නිසා, ගෑස් කාන්දුවීම ගැන ඔබව දැනුවත් කරන්න අපි කල්පනා කළා.

මුළුතැන්ගෙයි පාවිච්චි කරන ගෘහස්ථ ගෑස් සිලින්ඩරය ගැන අපි හරියටම දැනුවත්ද කියන කාරණය ගැන අපිට නැවත වරක් සිතා බලන්න සිදුවනවා. විශේෂයෙන්ම ගෑස් උඳුනක් භාවිතා කිරීමේදී සැළකිලිමත් විය යුතු කරුණු ගැන අපි නිවැරදිව අවදානය යොමු කරනවාද..? මේ ගැන අපි සිතා බැලිය යුතුමයි. ගෑස් උඳුන අපි භාවිතා කරන්නේ මුළුතැන්ගෙයි ඇතුළත නිසා බොහෝවිට රාත්‍රී කාලයේ වසාදැමූ මුළුතැන්ගෙය විවෘත කළ සැනින් උඳුන දැල්වීම කොහෙත්ම සුදුසු නැහැ. නමුත් නොදැනුවත්කම නිසා අපි කරන බරපතල වරදක් බව දැනගත යුතුමයි. ඔබ උදෑසන අවදි වූ සැනින් මුළුතැන්ගෙයට ගිය ගමන්ම සියල්ලට පෙර එහි ජනේල විවෘත කරන්න. මිනිත්තු කිහිපයක් ඇතුළතට හොඳින් වාතාශ්‍රය ලැබෙන පරිදි තබන්න. ඉන් පසුව ඔබ හොඳින්ම විමසිලිමත් විය යුතුයි කිසියම් ගෑස් කාන්දුවක් ඇතිවී ඇතිද යන කාරණය. සාමාන්‍යෙන් ගෑස් කාන්දුවක් වූ අවස්ථාවක ඒ බව ඔබේ නහයට හොඳින්ම දැනෙනවා. ඒ නිසා විමසිල්ලෙන් ඒ ගැන සොයා බලන්න. එවැනි යමක් ගැන ඉඟියක් තිබෙනවා නම් කිසි විටෙකත් ඔබේ ගෑස් උඳුන නොදල්වීමට කටයුතු කරන්න.

ඒ වගේම ගෑස් කාන්දුවීම් වලක්වා ගන්න නම් තවත් ඔබේ අවදානය යොමු කළ යුතු කරුණු කිහිපයක්ම තිබෙනවා. ඔබේ මුළුතැන්ගෙයි ගෑස් උඳුන සහ සිලින්ඩරය තිබෙන තැන ඉතාම වැදගත්. විශේෂයෙන්ම විදුලි රැහැන්, විදුලි පේනු ආදිය අසල මේ දෙකම තබන්න එපා කියන කාරණය සඳහන් කළ යුතුමයි. ඒ වගේම අදාළ රබර් නලය, රේගියුලේටරය ආදිය හොඳින් පවතිනවාද, නලය සවිකරන තැන් හොඳින් ආවරණය වී තිබෙනවාද කියන කරුණු ගැනත් ඔබේ සැලකිල්ල යොමුවිය යුතුමයි. එසේ නොවුනොත් ඔබටත් නොදැනීම ගෑස් කාන්දුවීම් නිසා විශාල විනාශයක් ඇතිවිය හැකියි. ඒ වගේම උඳුනෙන් පිටවන දැල්ල පිරිසිදු නිල පැහැයෙන් තිබිය යුතුයි. කහ හෝ තැඹිලි පාටින් දැල්ල පවතිනවා නම් වහාම ඔබේ ගෑස් උඳුන පරික්ෂා කරවාගත යුතුයි. එය අලුත්වැඩියාවට කාලය පැමිණ ඇති බවට ඔබට ලැබෙන ඉඟියක්. ඒ වගේම ඔබ ගෑස් උඳුනක ඉවුම් ඔඉහුම් කටයුතු කරන අවස්ථාවේ දුහුල් සහ ඉක්මනින් ගිනි ඇවිලෙන සුළු ඇඳුම් ඇඳීමෙන් වැළකීමත් පූර්ව ආරක්‍ෂිත පියවරක් බව සඳහන් වනවා.

මීට අමතරව අපි එදිනෙදා වැඩකටයුතු අතරේ කරන වැරදි කිහිපයක්ම ඔබේ මුළුතැන්ගෙයි හදිසි අනතුරක් ඇතිවීමේ අවදානමකට පාර කියනවා. ඒ නිසා එවැනි කටයුතු නොකිරීමට වගබලා ගැනීමත් අතිශය වැදගත්. කෑම පිසිමින් සිටින අතරතුර ලිප දල්වා තබා වෙනත් වැඩකට යාමෙන් වලකින්න. එලෙස යායුතු සෑම විටකම ලිප නිවා දමා යාමට වගබලා ගන්න. ඔබේ කෑම පිසින බාජන පිලිබඳ සැළකිලිමත් වන්න. පිසින අවස්ථාවේදී ඒවායේ මිට උඳුනෙන් පිටතට යොමුවන සේ තබාගන්න. නිතරම තෙල් සහ වෙනත් අපද්‍රව්‍ය නොබැඳෙන ලෙස උඳුන පවිත්‍රව තබාගන්න. හදිසි අවස්ථාවකදී භාවිතයට ගිනි නිවීමට භාවිත කළ හැකි බ්ලැන්කට්ටුවක් වැනි දෑ මුළුතැන්ගෙයි තබාගන්න. ගෑස් උඳුනට ආසන්නයේ ඔබේ අත්පිස්නා, වෙනත් රෙදි උපකරණ ආදිය තැබීමෙන් වළකින්න. මෙවැනි ආරක්‍ෂිත පියවර අනුගමනය කරමින් නිසි සැළකිල්ලකින් යුතුව කටයුතු කරගැනීමෙන් අවාසනාවන්ත ලෙස ඇතිවිය හැකි ගෑස් කාන්දු නිසා සිදුවන පිපිරීම් ආදිය වලක්වා ගැනීමට ඔබට හැකිවේවි. නිරන්තර විමසිල්ල සහ අවදානය ඔබට සහ ඔබේ ආදරණියයන්ට සැනසිල්ල ගෙනදේවි.

ජීවිතේට Break නෑ, දියවැඩියාවට Reverse නෑ…

By

editor

දියවැඩියාව කියන්නේ ලංකාවේ විතරක්ම නෙමෙයි ලෝකයේම දැඩි අවධානයක් දිනාගත් මාතෘකාවක්. ගෝලීය වසංගත තත්වයකට මුහුණ දෙමින් ඉන්න අතරවාරයේ වුනත් දියවැඩියාව ගැන සැළකිලිමත් වීම අමතක නොකළ යුත්තේ එයත් වසංගතයක් තරම්ම භයානක නිසයි. බෝනොවන රෝගයක් නිසා අපට දියවැඩියාව ගැන සුළුවෙන් තකන්න හැකියාවක් නැහැ. හේතුව මේ වනවිට ලෝකයේ වැඩිම පිරිසකට ජීවිතය අහිමි කරවන බෝනොවන රෝගය විදිහට හඳුනා ගන්නෙන්නේ දියවැඩියාව වීමයි. ඒ නිසාම දියවැඩියාව ගැන ඔබ දැනගත යුතුම කරුණු ටිකක් ඔබට කියන්න gasma.lk අපි තීරණය කළා.

දියවැඩියාව කියන්නේ “සුවකළ නොහැකි” රෝගයක් විදිහට දැනට හඳුනා ගැනෙනවා. එහෙම කතාවක් ඇහුවහම ටිකක් කලබල වෙනවා නේද..? නමුත් ඇත්ත තත්වය ඒකයි. දියවැඩියාව පාලනය කරන්න හැකියාව තියෙනවා වගේම හැදෙන්න කලින් වළක්වා ගන්නත් අවස්ථාව තියෙනවා වුනත් වැළඳීමෙන් පසුව සුවකිරීමක් ගැන සිතීම නිෂ්පල වැඩක්. ඒ නිසා දියවැඩියාව හැදෙන්න කලින් වළක්වා ගන්න නම්, ඔබ දැනගෙන සිටිය යුතුම කාරණා ටිකක් අපි මේ ලිපියෙන් ඔබේ අවදානයට යොමු කරන්න හිතුවා.

දියවැඩියාවේ මූලික ප්‍රභේද දෙකක් හඳුනා ගැනෙනවා. එයින් අපි වැඩිපුරම කතාබහ කරන්නේ Type II Diabetes නැතිනම් දෙවැනි කාණ්ඩයේ දියවැඩියාව කියන ප්‍රභේදය ගැන. මේ වර්ගය ඔබට වැලඳෙනවා නම්, ඒකට ප්‍රභලම හේතුව වෙන්නේ ඔබේ ජීවන රටාව සහ පුරුදු බව ඔබ මතක තබාගත යුතුමයි. 2016 වසරේ සංඛ්‍යාලේඛන දත්ත අනුව ලෝකයේ වැඩිම පුද්ගල මරණ වලට හේතුසාධක වූ කරුණු ලයිස්තුවේ 07 වැනි තැනට සඳහන් වුයේ මේ දෙවැනි කාණ්ඩයේ දියවැඩියාවයි.

ඔබේ දෛනික පුරුදු සහ ජීවන රටාව නිසා ඔබටත් නොදනිම වැළඳිය හැකි මේ දියවැඩියා තත්වය විවිධ ආකාර වලින් ඔබට හානි පැමිණවිය හැකියි. විශේෂයෙන්ම මේ හේතුවෙන් ශරීරයේ විවිධ පද්ධති වල ක්‍රියාකාරීත්වය අඩපණ වනවා. ඒ වගේම ඔබේ මොළයට, හෘදයට, ඇසට, ස්නායු පද්ධතියට වැනි විවිධ ශරීර අංග වල අකර්මණ්‍ය වීම් සිදුවීමේ අවදානමක්ද පවතිනවා. අංශභාග තත්වයට පත්වීම සහ මරණයට පත්වීමටත් දියවැඩියා තත්වය හේතුවිය හැකියි. ඒ නිසා මේ තත්වය වැළඳීමට පෙර වළක්වා ගැනීම අතිශය වැදගත්.

කොහොමද දියවැඩියාව වැළඳීම වළක්වා ගන්නෙ..? දැන් ඔබට මේ ගැටළුව ඇතිවනවා නේද..? මේක ඉතා අසීරු කටයුත්තක් නොවෙයි. ඔබේ දෛනික ජීවන රටාවේ සහ පුරුදු වල වෙනස්කම් කිහිපයක් පමණක් කිරීමෙන් ඔබට පහසුවෙන්ම දියවැඩියාවෙන් වැළකීමට හැකියාව තිබෙනවා. මොනවද ඒ පුරුදු..?

පළමු වැනිම කාරණය ඔබේ ආහාර රටාව වෙනස් කරගැනීම. ඔබ දැනට ගන්න කෑම වර්ග ගැන තරමක් සැළකිල්ලෙන් සිතා බලන්න. කොතරම් ශරීර සෞඛ්‍යට නුසුදුසු කෑම වර්ග ගණනාවක් ඔබ දවසකට ඔබේ ආහාර වල එකතු කරගන්නවාද..? මේ තත්වය වෙනස් කරගැනීම දියවැඩියාව වළක්වා ගැනීමේ මූලිකම පියවර වනවා. ඔබ දැනටමත් Fast food, junk foods වලට ඒ කියන්නේ සැකසූ ක්ෂණික කෑම වර්ග වලට පුරුදු වෙලා නම්, ඉක්මනින්ම මේ පුරුද්දෙන් මිදෙන්න ඔබට සිදුවනවා. ඒ වගේම ඔබේ ආහාර වේල නිසි අගයෙන් යුතු පෝෂක කොටස් ප්‍රමාණයන් සහිත එකක් විය යුතුමයි. ඒක එතරම්ම අමාරු කටයුත්තක් නොවෙයි. ඔබේ කෑම පිඟාන ගැන සිතා බලන්න. ඒ ප්‍රමාණය කොටස් හතරකට බෙදා ගන්න. මෙයින් 1/4ක් පමණක් කාබෝහයිඩ්රේට් අඩංගු කෑම වර්ග ඇතුළත් විය යුතුයි. ඒ කියන්නේ බත්, ඉඳි ආප්ප, පිට්ටු, කුරහන් මිශ්‍ර පාන්, පැස්ටා, නූඩ්ල්ස් වැනි ඕනෑම දෙයක් එක කොටසක ප්‍රමාණයට පමණක් ගත යුතුයි. ඊළඟ 1/4 වෙන් වන්නේ ප්‍රෝටීන වලට. සම රහිත කුකුල් මස්, මාළු, බිත්තර, මේද රහිත කිරි, සහ මේදය අඩු වෙනත් මස් වර්ග මේ කොටසට ඇතුළත් කරගන්න ඔබට පුළුවන්.ඉතිරි 2/34 ප්‍රමාණයට පිෂ්ටය නැති එළවලු එකතු කරගත යුතුයි. මේ පෝෂක අඩංගු වන විදිහට ආහාර වේල සකස් කරගැනීම මූලිකම අවශ්‍යතාවක් වනවා.

ඊළඟට ඔබේ බීම වර්ග භාවිතය ගැනත් සැළකිලිමත් විය යුතුයි. පිරිසිදු වතුර, සීනි රහිත තේ හෝ කෝපි, තක්කාලි හෝ එළවලු යුෂ සහ මේද රහිත කිරි වැනි බිම වර්ග පමණක් ඔබේ ශරීරයට එකතු කරගන්න වගබලා ගන්න. සෝඩා සහ කාබනේට් අඩංගු පාන, ශක්තිජනක බීම වර්ග, කෘතීම පැණිරසකාරක අඩංගු බීම වර්ග, ඇල්කොහොල් සහ ඇල්කොහොල් අඩංගු පාන වර්ග කියන මේ දේවල් ඔබේ කෑම බීම ලැයිස්තුවෙන් සම්පූර්ණයෙන්ම ඉවත් කරගන්න හැකි තරමට ඔබට දියවැඩියාවෙන් වළකින්න හැකියාව ලැබේවි.

ඒ වගේම ඔබ වයස අවුරුදු 40 ඉක්මවූ අයෙක් නම් ඔබ සාමාන්‍යෙන් ඉන්නෙ අවදානම් තත්වයක බව මතක තබා ගත යුතුයි. විටින් විට ඔබේ රුධිර සීනි මට්ටම පරික්ෂා කරවා ගන්න අමතක නොකළ යුතුයි. ඒ වගේම ඔබේ මුත්‍රා පිටවීමේ ප්‍රමාණය පිළිබඳව සැළකිලිමත්ව සිටීමත් වැදගත්. නිතර මුත්‍රා පිටවන්නේ නම් ඔබට කිසියම් අවදානම් තත්වයක් ඇතිවිය හැකි නිසා රුධිර සීනි මට්ටම පරික්ෂා කරවා ගැනීම වැදගත්. ඔබේ දෙමව්පියන්ට දියවැඩියාව තිබේ නම් ඔබ අනිවාර්යෙන්ම විමසිල්ලෙන් පසුවිය යුතුයි. ඒ වගේම ඔබ නිතර මානසික ආතතියෙන් පෙළෙනවා නම්, නිවසේ සහ කාර්යාලයේ වැඩකටයුතු සමග ආතතියට පත්වෙලා නම්, ඔබ නැවතත් ඉන්නෙ අවදානම් කලාපයක. ආතතිය හේතුවෙනුත් ඔබ දියවැඩියා රෝගියකු විය හැකියි. දෙපා හිරිවැටීම, දෙපාවල වේදනාවක් දැනෙනවා නම්, එයත් කිසියම් සලකුණක් විය හැකි බව වෛද්‍ය මතය වනවා. එවැනි යමක් පවතිනවා නම් නිසි පරික්ෂාවන්ට ලක්වීම වැදගත්.

කෙසේ නමුත්, දියවැඩියාව කියන්නෙ හැදෙන්න කලින් වලක්වා ගත යුතු දෙයක්. ඒ නිසාම ඔබේ සැලකිල්ල, ඔබේම ශරීරය වෙත යොමු කරන්න. ඔබේ ආහාර රටාවන් සහ ජීවන පුරුදු ගැන වෙනදාට වඩා සැළකිලිමත් වන ලෙස අපි ඔබට යෝජනා කරනවා.

එන්. වෙහෙරදූව

ලෝකය වෙනස් කරන ශ්‍රී ලාංකිකයින්

By

editor

අපේ ශ්‍රී ලාංකිකයින් කෙතරම් නම් නිර්මාණශීලීද? පහත දැක්වෙන්නේ එසේ ඉතිහාසය වෙනස් කළ නවෝත්පාදන බිහි කරනු ලැබූ ලාංකිකයින් පිරිසකුයි. සමාජය තුළ ධනාත්මක වෙනසක් ඇති කරන්නට තරම් ඔවුන්ගේ නවෝත්පාදන බලවත්! නිර්මාණශීලීත්වය සහ දක්ෂතාවය සහිත මේ ලාංකික නවෝත්‍පාදකයින් විවිධ ක්ෂේත්‍ර ඔස්සේ ජාත්‍යන්තරය තුළ තමන්ගේ නම තබන්නට සමත් වී තිබෙනවා.

සුරංග නානායක්කාර

2011 වසරේදී සුරංග “” ආයතනය පිහිටවනු ලැබූයේ, සංජානනීය හැකියාවන් හි සීමා පුළුල් කරන මානව පරිගණක පිළිබඳව ගවේෂණය කිරීම උදෙසායි. ඔහුගේ මෙම කාර්යය වඩාත්ම වැදගත් වන්නේ ඇසීමේ සහ පෙනීමේ ගැටලු නිසා විවිධ අභියෝගයන්ට මුහුණ දීමට සිදු වන පුද්ගලයන්ටයි.

සුරංගගේ තවත් පරීක්ෂණ ක්ෂේත්‍ර කිහිපයක්ම ලෝකයේ කතාබහට ලක්ව තිබෙනවා. Eye Ring යනු a finger-worn interface for seamless interactions such as gestures.
Haptic Chair ලෙස හඳුන්වන්නේ ශ්‍රව්‍යාබාධිත පුද්ගලයින්ට වඩාත් තෘප්තිකර/තෘප්තිමත් සංගීත අත්දැකීමක් ලබා දෙන ශ්‍රව්‍ය-දෘශ්‍ය පද්ධතියකි. Stick Ears යනු එදිනෙදා කාර්යයන් පහසු කරන ශබ්ද මත පදනම් වූ ස්ටිකි නෝට් වැනි දෙයක්… සෑම Stick Ears පද්ධතියක්ම ශබ්ද ආදානයට සහ ප්‍රතිදානයට, කුඩා මයික්‍රොෆෝනයකින් සහ ස්පීකරයකින් සමන්විත වේ.

සුරංග මේ නවෝත්පාදන වෙනුවෙන් සම්මාන රාශියකුත් ජයග්‍රහණය කර තිබෙනවා. ඒ අතර ආසියා පැසිෆික් කලාපය උදෙසා MIT Tech Review මඟින් සංවිධානය කෙරෙන TR35 සම්මානය (Young Inventor Under 35 award), Outstanding Young Persons of Sri Lanka (TOYP) ජයග්‍රහණය සහ INK Fellowship 2016ත් ඇතුළත්…

ආචාර්ය රංග ඩයස්

ආචාර්ය රංග ඩයස් යනු අධි-පීඩනය සහ උෂ්ණත්වය යටතේ වන ක්වොන්ටම් සංසිද්ධි පිළිබඳව පර්යේෂණ කරන ලොව පිළිගත් විද්‍යාඥයෙකි.

පෘථිවියේ දුර්ලභම ලෝහය වන Atomic Metallic Hydrogen H2 (solid) සොයාගැනීමට 2016-2017 වසරවල සිදු කළ පර්යේෂණවලදී සැලකිය යුතු කාර්යයභාරයක් ඉටු කිරීමට ඔහු සමත් වුණා.

ලොව ප්‍රථම කාමර-උෂ්ණත්ව අධි සන්නායකය සොයා ගත්තේද ආචාර්ය රංග ඩයස්ගේ කණ්ඩායමයි. භෞතික විද්‍යාවේ පෙරළිකාර සොයාගැනීමක් වූ එතුළින්, කාමර-උෂ්ණත්වයේ පවතින අධි සන්නායකයක් නිර්මාණය කිරීමට භෞතික විද්‍යාඥයින් තුළ වූ ගැටලුවට පිළිතුරු ද සැපයිණි.

රකිත මාලේවන

රකිත මාලේවනගේ පර්යේෂණ බොහෝමයක් සිදුවන්නේ වෛද්‍ය සහ අණුක විද්‍යාව මුල් කරගෙනයි. HIV/AIDS සහ ලියුකේමියාවට සාර්ථක ප්‍රතිඵල ගෙන දෙන ප්‍රතිකාර ක්‍රම ගොඩ නැංවීමට ඔහු කළ පර්යේෂණ ජාත්‍යන්තර සම්මානයට පාත්‍ර විය.
මනුෂ්‍ය ලියුකේමියා සෛල සඳහා නැනෝ තාක්ෂණය භාවිතයෙන් ඔහු කළ ප්‍රතිකාර පර්යේෂණය, 2014 වසරේ ඉන්දුනීසියාවේ ජකර්තා නුවර පැවැත්වූ International Science Projects Olympiad හි / ඔලිම්පියාඩ් ජාත්‍යන්තර විද්‍යා ව්‍යාපෘති තරඟාවලියේ ලෝකඩ පදක්කමක් දිනා ගැනීමටත් සමත් වුණා.

රකිත විසින් වාරි ජල සංරක්ෂණය සඳහා සුවිශේෂී ක්‍රමයක් සොයා ගනු ලැබුවේ 2012 වසරේදීයි. එය Stockholm Junior Water Prize National Competition තරඟාවලියේදී කුසලතා සම්මානයක් දිනා ගත්තා.

HIV සහ AIDS ආසාදිතයින් වෙනුවෙන් ඔහු කළ සමාජ මෙහෙවර අගයමින් 2016 වසරේ පොදු රාජ්‍ය මණ්ඩලයීය Queen’s Young Leaders ගෞරව නාමයෙන් පිදුම් ලැබීමටත් ඔහු සමත් වුණා.

මංජු ගුණවර්ධන

මංජු ගුණවර්ධන මාතර ප්‍රදේශයේ උපත ලද ජ්‍යෙෂ්ඨ පර්යේෂකයෙකි; විද්‍යාඥයෙකි. ඉන්ෆ්ලුවන්සා ව්‍යාප්තිය සීමා කිරීමට නිපද වුණු නැනෝ බල්බය/බුබුළ ඔහුගේ විශිෂ්ඨ සොයාගැනීමකි. ජාත්‍යන්තර සම්මානලාභී මෙම ලාංකීය පර්යේෂකයා පවසන්නේ කොරෝනා වෛරසය ඇතුළු වාතයෙන් බෝවන අනෙකුත් රෝග සඳහා ප්‍රත්‍යක්ෂ විසඳුමක්ද තමන් සතුව ඇති බවයි.

ඔහුගේ නවෝත්පාදනයේ තිබෙන නැනෝ අංශු මඟින් වායුගෝලයේ පවතින විෂ රසායනික, බැක්ටීරියා සහ වෛරස විනාශ කරනවා. මෙම නවෝත්පාදනය උදෙසා එක්සත් රාජධානිය විසින් නිකුත් කළ පේටන්ට් බලපත්‍රයක්ද ගුණවර්ධන සතුයි.

වාතයේ විෂබීජ විනාශ කරන නැනෝ අංශුවලින් සමන්විත වන මෙම උපාංගය ඔබේ නාන කමරයේ හෝ මුළුතැන්ගෙයි සවි කරන්නට පුලුවන්.

දිනේෂ් කටුගම්පල

ලෝකයේ පළමු radius meterය සොයාගත්තේ ඔහුයි. එය ඕනෑම ගෝලයක හෝ චාපයක අරය මැන ගත හැකි උපකරණයකි. මෙම උපකරණය නිර්මාණය කිරීමට පෙර, ඕනෑම වෘත්ත කොටසක අරය මැනගත හැකි ගණිතමය සූත්‍රයක්ද ඔහු විසින් එළි දක්වන ලදී. ඔහුගේ ගණිතමය සූත්‍රය Square Dual Theorem ලෙසින් හැඳින්වෙන අතර radius meterයට මුල් වූයේද එයයි.

2009දී ඔහුගේ උපකරණය සහ ගණිතමය සූත්‍රය යන ද්විත්වයටම අදාළ පේටන්ට් බලපත්‍ර දිනේෂ් ලබා ගත්තා. ඔහුට අවශ්‍ය වන්නේ ඔහුගේ ගණිතමය සූත්‍රය ගණිත විෂය නිර්දේශයට ඇතුළත් කර පාසල්වල ඉගැන්වීමටයි.

2008 වසරේදී මොරටු විශ්ව විද්‍යාලයේ NDT තාක්ෂණ ඩිප්ලෝමාව හදාරන අතරතුරේදීයි ඔහු මෙම උපාංගය නිර්මාණය කළේ…

ආචාර්ය අනුප හේරත්

ආචාර්ය හේරත් විසින් වැඩි දියුණු කළ නව ස්වරාලේක්ෂ අනුරුවට 2017 වසරේ ජිනීවා හි පැවති ජාත්‍යන්තර නව නිපැයුම් තරඟාවලියේදී රන් පදක්කම හිමි වුණු අතර ජූරියේ විශේෂ අවධානයක් දිනා ගන්නත් ඔහු සමත් වුණා. ඔහු විසින් නිපදවූ මෙම වීඩියෝ-ස්වරාලේක්ෂය (Video-Laryngoscope with Extended Functions) ශරීර අභ්‍යන්තරය හොඳින් පරීක්ෂා කරමින් ජීවිත රැසක් බේරා ගැනීමට මහඟු උපකාරයක් වුණා.

මෙම ශ්‍රී ලාංකිකයින්, දැවැන්ත පරිශ්‍රමයක් දරා නිපදවූ තමන්ගේ නවෝත්පාදන සහ පර්යේෂණ හරහා ලෝකයට කරන ධනාත්මක බලපෑම සුලු පටු නොවේ. අප දකින්නේ අවසාන සාර්ථක ප්‍රතිඵලය පමණක් වුණත්, ඒ සාර්ථකත්වයට ළඟා වෙන්නට පෙර කෙතරම් අභියෝගයන්ට මුහුණ දෙන්නට ඔවුන්ට සිදු වූවා ද යන්න දන්නේ ඔවුන්ම පමණයි.

ඔවුන් විසින් පෙරදී සොයාගත් නවෝත්පාදන සහ සිදු කරමින් සිටින පර්යේෂණවල බලපෑමෙන් වෙනස් වන්නේ මේ ලෝකයේ අනාගතයයි. ඇත්තෙන්ම අපේ මේ නවෝත්පාදකයින් නොසිටින්නට ලෝකය කෙතරම් නීරස වෙන්නට තිබුණාද?

ඉතින්…
ඒකාකාරී ප්‍රශ්නවලට පිළිතුරු සොයමින් ලෝකය වඩාත් සුන්දර තැනක් බවට පත් කරන්නට වෙහෙස වෙන අපගේ නිර්මාණශීලී නවෝත්පාදකයින්ට අප ස්තූතිවන්ත විය යුතු නැත්ද??

විලාසිතාවට කැමති ඔබ මේ කරුණු ගැන දැනුවත්ද ?

By

editor

විලාසිතා ගණනාවක් තිබුණත් මේ හැම විලාසිතාවක්ම එකිනෙකට ගලපගෙන හරියට විලාසිතා කරන්නේ කොහොමද? එය ඇත්තටම අසීරු කටයුත්තක්. විලාසිතා හැම තැනටම ඔබින විදියට තමයි කළ යුත්තේ. අපේ හිසේ සිට පාදාන්තය දක්වාම එකිනෙකට ගැළපෙන විලාසිතා අද වෙනකොට පුදුමාකාර විලාසිතා ලෝකය තුල නිර්මාණය වෙලා තියෙනවා. ඇඳුම් ආයිත්තම් හිසකෙස් විලාසිතා ,ස්කාෆ් විලාසිතා මේ ආකාරයෙන් විලාසිතා ගණනාවක් වෙළඳපොලේ අපිට දක්නට ලැබෙන අතර මෙම විලාසිතා වලට යොමුවෙන පුද්ගලයින් දිනෙන් දින වැඩිවීමක් සිදුවෙනවා.

නව යොවුන් වියට පා තැබූවන් හා නව යොවුන් විය පසු කරන්නන් මේ විලාසිතාවන් පසුපස යනවා අනෙක් අයට වඩා තරමක් වැඩි. ආකර්ශනය දිනා ගන්න නම් ලස්සනට ඇඳලා කරල ඉන්න ඕන. විලාසිතාවන්ට හැමෝම ආදරය කරත් දකින දකින විලාසිතාව කරලා හරියන්නේ නැහැ. නිවැරදි තෝරාගැනීමක් කරන්න විලාසිතා පිළිබඳ යම් අවබෝධයක් තිබීම නම් අවශ්‍යයි. එය තමන්ගේ ජීවිතයට බොහෝ වැදගත්. මන්ද යත් තමන් තෝරාගන්නා විලාසිතාව නිවැරදි තේරීමක් විය යුත්තේ අවසානයට එය පරිසරයට බැහැර වන නිසයි.

විලාසිතාවේ උපත සිදුවන්නේ විසිවැනි ශතවර්ෂයේ පැරීසියේදීය. එතනින් පටන් ගත්ත විලාසිතාවන් වැඩි දියුණු වෙමින් තමයි අද බොහෝ නිර්මාණයන් බිහි වෙන්නේ. ඒ වගේම තමයි එන්න එන්නම විලාසිතාවන් ජනප්‍රිය කලාවක් වන නිසාම පරිසරයට එයින් හානිකර බලපෑම් රැසක් එල්ල වෙනවා. පරිසරය නැත්නම් සොබාදහම විනාශ වේනවා කියන්නේ මුළු මනුස්ස සංහතියටම තද ප්‍රහාරයක් එල්ල වෙනවා කියන එකයි. මානසික පීඩනයක් ආවත් අපගේ ගෙදර තියෙන පාරිසරික වටපිටාව ගස්කොලන් දිහා බලන් හිටියම ඒ පීඩනයක් බොහෝදුරට සමනය වෙනවා . ඉතින් අපි අපේ ආසාවන් නිසා සොබාදහම කියන මේ අම්මට හානි කරන්න පුලුවන්ද ? අපි එහෙම කරනවා නම් ඒක ලොකු අපරාධයක් . ඒ නිසාමයි මෑත කාලය වන විට මේ විලාසිතා නොයෙක් අයුරින් නිපදවන්නේ. මේ අතරින් එකක් තමයි පරිසර හිතකාමි විලාසිතා.

පරිසර හිතකාමි විලාසිතා? ඔබ දැනටමත් හිතනවා වන්නට පුළුවන් කොහොමද මේ පරිසර හිතකාමි විලාසිතා බිහිවන්නේ කියා. මම ඔබට අද ඒ ගැන කියලා දෙන්නම්.

Eco fashions එහෙමත් නැත්තම් පරිසර හිතකාමී විලාසිතා

මේ පරිසර හිතකාමි විලාසිතා නිපදවන්නේ පරිසරයට සිදුවන හානිය අවම කිරීමටයි. Eco fashions නැතිනම් පරිසර හිතකාමි විලාසිතා ලෙස සැලකෙන්නේ ඇඳුම් විලාසිතාව පමණක්ම නොවෙයි. ඕනෑම පරිසරයට සුදුසු හානියක් නොකරන පරිසර හිතකාමි විලාසිතයි. මේ විලාසිතා නිපදවද්දී කාබනික කපු ,ප්‍රතිචක්‍රීකරණය කළ හැකි රෙදි වර්ග සහ ශාක පදනම් කරගත් ඩයි වර්ග තමයි යොදාගැනෙන්නේ . පාරිභෝගිකයින්ගේ සෞඛ්‍ය තත්ත්වයට වගේම එම නිෂ්පාදන නිපදවන්නන්ගේ සෞඛ්‍යයටද මේ විලාසිතාව ඉතාමත් හිතකරයි.

ඔබ පරිසර හිතකාමී විලාසිතා තෝරා ගත යුත්තේ ඇයි?

අප හැමවිටම කල්පනාකාරී විය යුතුයි අපගේ සෞඛ්‍යයට මනාව ගැලපෙන්නේ සහ ආරක්ෂිත ඇඳුම් මොනවාද කියා. බොහෝ පිරිස් අඩු මිලට ගන්නා නයිලෝන් සහ synthetic වලින් නිපදවූ ඇඳුම් සෞඛ්‍යයට එතරම් සුදුසු නැහැ. අපි විලාසිතාවක් තෝරා ගන්නා සෑම විටකම එය නිෂ්පාදනය කර ඇති අමුද්‍රව්‍ය පිළිබඳව යම්තාක් දුරකට දැනුමක් තිබීම ඉතාම වැදගත්. මොන ආකාරයේ විලාසිතාවක් අප තෝරා ගත්තත් එය අන්තිමටම බැහැර වන්නේ පරිසරයටයි. එම නිසාම ඔබ තෝරාගන්නා විලාසිතාව පරිසරය වගේම ඔබට මොනතරම් සෞඛ්‍ය ආරක්ෂිතවේද යන්න වැටහීමක් තිබීම ඉතාමත් අත්‍යවශ්‍යයි. ඒ වාගේම ඉහත රෙදි පිලි වර්ග පාවිච්චියට ගෙන පරණ වූවාට පසු ඒවා නොදිරන නිසා අවුරුදු සිය ගණනක් පස තුළ වැඩී තිබෙනවා. එයින් පරිසරයට දැඩි ලෙස හානි පැමිණෙන්නට පුළුවන්. එම නිසාම අපි ඕනෑම මොහොතක තෝරාගන්නා විලාසිතාවක් තමන්ට අවශ්‍යම නම් පමණක් මිලදී ගත යුතු අතර එය පරිසරයට මොනතරම් දුරට බලපෑමක් ඇති කරනවා ද යන්න පිළිබඳව ඔබට අවබෝධයක් තිබිය යුතුයි. ඔබ ලිනන් හා කපු රෙදි වලින් නිපදවූ රෙදිපිළි තෝරා ගන්නවානම් එය ඔබගේ සෞඛ්‍යයට සහ ඔබගේ ශරීරයට ඉතාමත් පහසු දායක වේ. එම නිසා සෑම විටකම ඔබ රෙදිපිළි මිලදී ගනිද්දී කල්පනාකාරී වන්න .

slow fashion

සෙමෙන් නිෂ්පාදනය වෙන විලාසිතා හෝ slow fashion ලෙස හඳුන්වනු ලබන්නේ පරිසර හිතකාමි විලාසිතයි. මෙම slow fashions නිෂ්පාදනය වන්නට හේතු වූයේ බංගලාදේශයේ දී ඇති වූ විලාසිතා විප්ලවයෙනුයි .මෙම විලාසිතා අනෙක් විලාසිතාවන්ට වඩා ප්‍රමිතියෙන් වැඩි, මන්දයත් මෙම විලාසිතාවන් නිපදවන්නට බොහෝ ක්‍රමවේද හා විශාල ශ්‍රමයක් යොදන නිසයි. මේ ආකාරයෙන් නිපදවන රෙදිපිළි දීර්ඝ කාලයක් පාවිච්චියට ගත හැකි ලෙස නිර්මාණය කරයි. දීර්ඝ කාලයක් පාවිච්චි කර එය අහක දැමුවාට පසු පරිසරයට එකතු වුවත් එයින් පරිසරයට කිසිදු හානියක් නොකර දිරා යයි. එම නිසාම මෙම slow fashion පරිසර හිතකාමි විලාසිතාවක් ලෙස නම් කර තිබේ.

පරිසර හිතකාමි විලාසිතා නිෂ්පාදනය හිතන තරම් පහසු නැහැ.

පරිසර හිතකාමි විලාසිතා හෝ හරිත විලාසිතා ලෙස හැදින්වෙන මෙම විලාසිතා තරමක් මිලෙන් වැඩියි. ලිනන් සහ කපු වර්ග භාවිතා කරන නිසා මෙම විලාසිතා බොහෝවිට මිලදී ගැනීමට අසීරු යි. එයට හේතුව වන්නේ ඒවා නිෂ්පාදනය කිරීම ද හිතන තරම් සරළ ක්‍රියාවලියක් නොවන නිසයි. මෙම හරිත විලාසිතා නිෂ්පාදනය කරන්නට අවශ්‍ය කපු වර්ග වල අස්වැන්න නෙලා ගත් පසු නැවත ඒවා වගා කිරීම සඳහා කාලයක් ගතවෙනවා. එම නිසා මෙම හරිත විලාසිතා නිෂ්පාදනවල මිල අධික වීමක් සිදුවෙනවා. පරිසර හිතකාමී ලෙස නිපදවන ඕනෑම ආකාරයක විලාසිතාවක් අධික මිලකින් යුතු වන්නේ එම නිසයි.

මිලෙන් වැඩි වූවත් පරිසර හිතකාමී කල් පවතින සෞඛ්‍යයට ආරක්ෂිත මෙවැනි විලාසිතා ඔබ තෝරාගන්නේ නම් එය ඔබගේ ශරීරයට වඩාත් ගුණදායකයි.

කාලයෙන් කාලයට දවසින් දවස එක එක සුකුරුත්තම් වෙළඳ පොලට එනවා. හැබැයි ඒ හැම එකක්ම වාගේ මිලදී ගන්නට හැකි ආර්ථික ශක්තියක් අපි හැමදෙනාටම නැහැ. තමන්ට තියෙන දෙයින් වැඩි ප්‍රයෝජනයක් ගන්න තමයි අප හැම දෙනාම වෙර දරන්නේ. පුංචි පුංචි දේවල් වලිනුත් අපගේ විලාසිතාවේ හැඩය ඔප මට්ටම් කර පෙන්වන්නට හැකියාවක් තිබෙන බව ඔබ දන්නවාද? ඉතින් මොනවද මේ වයසට නොයන අදට ඔබින විලාසිතා . අතීතයේ දී ජනප්‍රියව බොහෝ දෙනා භාවිතා කළ විලාසිතා ද වර්තමානයේ දී නව ප්‍රවණතා ලෙස සමාජයට දකින්නට ලැබෙනවා. ඒවායේ සිදුව ඇත්තේ ඉතාමත් කුඩා වෙනස්කම් පමණයි. පරණ වුවත් මේ කාලයේ භාවිතයට සුදුසු විලාසිතා මොනවාද?

කොඩ්රොයි විලාසිතා (corduroy fashion )

කොඩ්රොයි විලාසිතා ලෙස හැදින්වන්නෙ අතීතයේ දී ජනතාව අතර ඉතාමත් ප්‍රසිද්ධ වූ රෙදි වර්ගයකි . මෙම රෙදි වර්ගය ප්‍රධාන වශයෙන් භාවිතා කර ඇත්තේ කුඩා ලමුන්ගේ ඇදුම් සදහායි . එහෙත් වර්තමානයේ දී මෙම රෙදි වර්ගය ගැහැණු ලමුන් භාවිතා කරන අත් බෑග්, ජම්ප් සුට් ,ජැකට් සහ විශාල ප්‍රමාණයේ බෑග් නිපදවීමට මෙම රෙදි බහුලවම භාවිතා කරයි . මෙය ඉතාමත් ජනප්‍රිය විලාසිතාවක් ලෙස අද සමාජයේ ප්‍රසිද්ධ වී ඇත. වැඩි ආකර්ෂණයක් දිනාගැනීමට ද මෙම විලාසිතාව සමත් වී ඇත.

මම් ජින්ස් ( mom jeans)

මෙම මම් ජින්ස් විලාසිතාව ඉතාමත් පැරණි ඩෙනිම් කලිසම් විලාසිතාවක්. මෙම කලිසමේ ඇත්තේ ඉහළටම යෙදූ ඉනක්. 80 දශකයේ නිර්මාණය කෙරුණු මෙම විලාසිතාව 90 දශකයේ ඉතාමත් ජනප්‍රිය අන්දමින් ප්‍රසිද්ධ වුණා. වර්තමානයේ දී යුවතියන් අතර ඇඟටම තද වූ ජින්ස් විලාසිතා වෙනුවට මෙවැනි විලාසිතා දැකගත හැක. කැපී පෙනෙන ආකාරයට බෙල්ට් එකක් සහ පාවහන් සමග මේ විලාසිතාව තවත් සිත් ඇදගන්නා සුළු වේ.

ස්ක්‍රන්චි (scrunchies)

විලාසිතා කිවුවහම ඇඳුම පමණක් නෙවෙයි. මේ විලාසිතාව තරමක් වෙනස් . අලුත් වුවත් පැරණි වුවත් මෙම විලාසිතාව ලොකු ,පොඩි ,තරුණ යුවතියන් අතරින් ගිලිහී ගොස් නම් නැහැ. මෙම හිසකෙස් විලාසිතාව ඉවත ලන රෙදි කැබලි වලින් පවා සකසා ගත හැක. headband එකක් විදිහට හෝ කොන්ඩ බූල ලෙස භාවිතා කරන මෙම scrunchie අද වන විට බොහෝ සෙයින් ප්‍රසිද්ධයි . මෙවැනි විලාසිතාවක් ඔබේ ඇඳුමට ගැළපෙන සේ එකතු කරගන්නවා නම් එයින් ඔබගේ වරලස වගේම ඔබත් කැපී පෙනෙවි .

සිල්ක් ස්කාෆ්

අද කාලේ තරුණියන් නිර්මාණශීලීත්වය උපයෝගී කරගනිමින් හිසකෙස් සැරසීමට මෙන්න අත් බෑග් වල අලංකාරය සඳහා ද මෙම ස්කාෆ් විලාසිතා භාවිතා කරනවා. 90 දශකවල අතිශයින්ම ජනප්‍රියට පත් වූ මෙම ස්කාෆ් විලාසිතාව වර්තමානයේ දී නව විලාසිතා මවනවා. ඒ වගේම ඩෙනිම් ටී-ෂර්ට් වැනි විලාසිතාවලට පවා තවත් අලංකාරවත් ලෙස ගෙල වටා පැළඳවීට ද මෙම විලාසිතාව යොදා ගන්නවා.

චන්කි ස්නිකර් (chunky sinkers)

80 දශකයේදී නව යොවුන් වියේ තරුණියන්ගේ සිත් වසඟයට පත් කරගත් මෙම සපත්තු විලාසිතාව නැවතත් කරලියට පැමිණේ යැයි කිසිවකු නොසිතන්නට ඇති. අද වන විට බොහෝ නිර්මාණකරුවන්ගේ සිත් දිනාගත් මෙම සපත්තු විලාසිතාව නවීකරණය කර කරලියට පැමිණ ඇත. මෙම විලාසිතාව වර්තමානයේ දී නව ප්‍රවණතාවක් ලෙස තරුණියන් අතර දක්නට ලැබෙනවා.කාලයට අනුව බොහෝ දේ වෙනස් වුවත් පෙර දශක වල භාවිතා කළ මේ විලාසිතාව වර්තමානයේ දී නැවත භාවිතා කරන අයුරු දක්නට ලැබෙනවා.

සමාජයෙන් දුරස් වෙලා ආරක්ෂිතව ඉන්න කියන මේ කාලේ shopping කරන්න යන්න හැකියාවක් නම් අපිට නැහැ. ඒ නිසා ම තමයි ඔන්ලයින් වලින් බොහෝ දෙනා තමන්ට අවැසි දේ ලබා ගන්නේ. අපේ රටේ පමණක් නොව මේ වන විටත් විට ලෝකය පුරාම online shopping ක්‍රමය ඉතාමත් ප්‍රසිද්ධ වෙළඳ ජාලයක් බවට පත්ව තිබෙනවා. මෙය ඉතාමත් පහසු ගනුදෙනු කිරීමක් බව ඔබ මම අපි හැමදෙනාම දන්නවා එහෙත් මෙම ගනුදෙනු වලින් ඇතැම්විට පහසුව වගේම අපහසුතා වලටත් මුහුණ දෙන්නට වෙනවා . එම නිසාම ඔබත් online ගනුදෙනු කරනවා නම් මේ කියන්නට යන දේ ඔබටත් වැදගත් වේවි.

වෙනදාට මෙන් හිතේ හැටියට සාප්පු සවාරි යන්න බැරි බව හැගුණම කාන්තාවන් වන ඔබට පුංචි දුකක් හිතේ හටගන්නවා ඇති. පිරිමින්ට වඩා කාන්තාවන් ලස්සන විලාසිතා වලින් හැඩ ගැන් වෙන්නට බොහෝවිට ප්‍රිය කරනවා. සාප්පු සවාරි ගියාම හිතේ හැටියට තමන්ට අවශ්‍ය දේ අල්ලලා බලලා පරික්ෂා කරල ගන්නට තිබෙන හැකියාව ඔන්ලයින් ක්‍රමය තුළ නැති බව ඔබ දන්නවා.එම නිසාම ඔබ ඔන්ලයින් ක්‍රමයෙන් ඇනවුම් කරන භාණ්ඩයේ ප්‍රමිතිය ගැන වඩාත් උනන්දු විය යුතුයි. මේ ආකාරයෙන් තාක්ෂණයක් ඔස්සේ ඔබ ගනුදෙනු කිරීමේදී ඔබ දකින රූපයේ තිබෙන භාණ්ඩයට වඩා හාත්පසින් ම වෙනස් ආකාරයේ භාණ්ඩයක් ඔබ අතට පත් විය හැක. එම නිසාම මෙ ඔන්ලයින් ගනුදෙනු පිළිබඳ ඔබට මනා දැනුමක් තිබීම හා නිවැරැදි තොරතුරු දැන ගැනීම වඩාත් වැදගත් වෙයි.

නිවැරදි තොරතුරු දැනගැනීම කොතරම් දුරට සාර්ථක ද?

ඔන්ලයින් භාණ්ඩ මිලදී ගැනීමේදී වගේම ඉහත කී විලාසිතා වර්ග තෝරා ගැනීමේදී ඔබ තෝරා ගන්නා වෙළදුන්ගේ අදාල පිටුවේ අවශ්‍ය සියලුම විස්තර තිබේදැයි පරික්ෂා කර බලන්න. යම් භාණ්ඩයක් පරිහරණයට නුසුදුසු ලෙස ඔබට ලැබී ඇත්නම් එය නැවත මාරු කිරීමේ පහසුව ඔවුන් විසින් ලබා දෙනවාද ?නැද්ද ?යන්න ඔවුන්ගෙන් කරුණු විමසා දැනගන්න. අදාළ සේවාව තුළ ඇතුලත් කර ඇති තොරතුරු ප්‍රමාණවත් නැති නම් භාණ්ඩය මිලදී ගැනීමට පෙර ඔවුන් හා දුරකථන මාර්ග වලින් සම්බන්ධ වී වැඩි විස්තර අසා දැනගැනීමෙන් අනතුරුව සේවාව ලබා ගැනීමට අමතක කරන්න එපා.

විලාසිතා වලට පෙම් බැන්දාට අන්තර්ජාලය පුරා දකින ඕනෑම ජාලයක් හරහා භාණ්ඩ මිලදී ගැනීම නොකළ යුතු දෙයක්. එයින් ඔබට දැඩි සේ පාඩු වන්නට පුළුවන් .එම නිසා භාණ්ඩ වල නිසි ප්‍රමිතිය පිළිබඳ සොයා බලා භාණ්ඩ ඇණවුම් කරන්න. ඒ වගේම ඔබ හිතුනු හිතුනු ආකාරයට මිලදීගැනීම් කරනවාට වඩා භාණ්ඩවල තත්වය එහි නිවැරදි වටිනාකම දැනගෙන භාණ්ඩ ඇණවුම් කරන්න. එය ඔබට වඩාත් වාසිදායක වේ . නැතිනම් භාණ්ඩයේ වටිනාකමට වඩා ඔබ මුදල් ගෙවන අවස්ථා වලට ද හසු වෙන්නට පුළුවන්.

විලාසිතාවලට ඇලී ගැලී සිටින යුවතියන් දැනගත යුතුම කරුණු තමයි මේ .පරිසරයට හානි නොවන ලෙස විලාසිතා කර එයටම ගැලපෙන අදට ඔබින කවදාවත් වයසට නොයන විලාසිතා සුපුරුත්තමත් භාවිතකරහම ඔබේ රූපය තවත් ලස්සනට දිස්වේවි .ඒ වගේම ඇස් රවටන එක එක ජාතියේ ඔන්ලයින් පේජ් වලින් භාණ්ඩ මිලදී ගන්නට යන්නටද එපා. ප්‍රමිතිය ගැන සොයා බලා අදාල විලසිතාවන් මිලදි ගන්න .එය නුවනට හුරු වේ.

අන්තර්ජාලය ඇසුරිනි.

මන්දාකිනි පතිරණ .

ඔයාගේ නිවස තුළ වවන්න හොඳම ශාක වර්ග

By

editor

අපි හැමෝම ගෙවමින් ඉන්නේ ඉතාම කාර්යබහුල ජීවිතයක්. උදේ දවස පටන් ගන්න වෙලාවේ ඉඳන් රෑ නින්දට යන මොහොත වෙනකන්ම ගෙදර දොර වැඩකටයුතු, දරුවන්ගේ වැඩකටයුතු, පවුලේ අනිකුත් ආදරණියන්ගේ අවශ්‍යතා වගේම රැකියා අවශ්‍යතා වෙනුවෙනුත් හුඟක් වෙහෙස මහන්සි වෙන්න අපට සිදුවනවා. මේ තෙහෙට්ටුව, වෙහෙස එක්ක ජීවත් වෙලාම එපා වෙලා වගේද..? එහෙම හිතෙන එකත් සාමාන්‍යයි. ඒ කියන්නෙ ඔයාට මානසික සුවයක් අවශ්‍යයි. ශාරීරික තෙහෙට්ටුව වගේම මානසික වෙහෙසත් නිවාගන්න යමක් නොකළොත් ඔයාට ජීවිතේ එපා වීම වළක්වාගන්න බැරිවේවි.

ඇත්තටම කොහොමද මානසික සුවය ලඟාකරගන්නේ..? මේකට නොයෙක් ක්‍රම තියනවා. වටපිටාව දිහා අවදානයෙන් බැලුවොත් ඔයාගේ මනසට සැනසිල්ල ගෙනේ දේවල් කිහිපයක්ම ඔයාට හමුවේවි. ගස් වැල් මේ අතරින් ප්‍රධාන තැනක් ගන්නවා. හැබැයි ඉතාම කාර්යබහුල වටපිටාවක වගේම ඉඩකඩ සීමිත නිවෙසක්ත් ජිවත් වෙන ඔයා දැන් කල්පනා කරන්නෙ “අපි කොහොමද ගස් වවන්නේ..?” කියල නේද..? මෙන්න මෙහෙම හිතෙන ඔයාගේ ගැටළුවට විසඳුමක් දෙන්නයි අපි මේ සුදානම් වෙන්නෙ. ඇහැට වගේම හිතටත් සැනසිල්ලක් ගෙනදෙන ගස් ටිකක් ඔයා ජීවත් වෙන පුංචි ඉඩකඩේ, නැතිනම් කාර්යාල පරිසරයේ වවාගන්නෙ කොහොමද..? එහෙම නඩත්තු කරන්න පුළුවන් ගස් වර්ග මොනවද..? ඒවා වවන්න අවශ්‍ය කරන සාධක මොනවද..? අපි එකින් එක ඒ ගැන දැනුවත් වෙමු.

මේ විදිහට පහසුවෙන් නඩත්තු කරන්න පුළුවන් ගස් වර්ග කියල මුලින්ම අපි දැනගෙන සිටීම අත්‍යවශ්‍යයි. ඔයාගේ ගෙදර නැතිනම් කාර්යාලය ඇතුලේ වවාගන්න හැකි වෙන්න ඕනේ වගේම පහසුවෙන් නඩත්තු කළ හැකි, ලොකු ඉඩකඩක් වෙන් කිරීම අවශ්‍ය නැති ගෘහස්ථ ශාඛා නැතිනම් Indoor- plants වර්ග කිහිපයක් සහ ඒවා වගා කරගන්න ක්‍රම ගැන එකින් එක ඔබව දැනුවත් කරන්නම්.

AGLAONEMA

අපි මුලින්ම හඳුන්වා දෙන ගෘහස්ථ ශාඛය තමයි Aglaonema. පහසුවෙන් වගාකරගන්න පුළුවන් වගේම පහසුවෙන් නඩත්තු කරන්නත් හැකි ශාඛයක් මේක. ඒ වගේම මේ පලයක් තැබීමෙන් පරිසරයටත් අමුතු හැඩයක් එකතු වෙනවා. කොහොමද මේ පැලය සිටවන්නේ කියල මුලින්ම දැනගත යුතුයි. මේ වර්ගය ගෘහස්ත ශාඛයක් විදිහට තමයි වඩාත්ම සාර්ථකව වැවෙන්නෙ. ඒ කියන්නෙ කෙලින්ම ඉර අවුවට නිරාවරණය නොවී පරාවර්තිත ආලෝකය යටතේ ගෙදර ඇතුලේ තියාගෙන හදන්න පුළුවන් වර්ගයක්. අඩු උෂ්ණත්වයකදී ඉතා හොඳින් වර්ධනය වෙන ගහක්.

මේ පලය සිටුවීමට වගා මාධ්‍ය සකස් කරගැනීමේදී ඔයා සැලකිලිමත් විය යුතු කාරණා කිහිපයක් තියෙනවා. මුලින්ම කොහොමද බඳුනට වගා මාධ්‍ය එකතු කරන්නෙ කියන එක ගැන ඔයා දැනුවත් වෙන්න අවශ්‍යයි. ඔයා පැලය සිටවන්න භාවිත කරන පෝච්චිය අනුව ඔයාගේ මිනුම් පරිමාණය තීරණය කරගන්න. ඊළඟට ගංගා වැලි කොටස් 1ක්, කොළ පොහොර (කොම්පෝස්ට්) කොටස් 2ක්, අඟුරු කැබලි කොටස් 1/4ක්, ලොම් පස් කොටස් 4ක් සහ වියළි ගොම කොටස් 1ක් එකතු කරගෙන ඔයාගේ වගා මාධ්‍ය නිර්මාණය කරගන්න. මේ විදිහට සිටුවාගන්නා පැලය මුලින් සඳහන් කළා වගේම අඩු ඉර එළිය තත්වයක් යටතේ පවත්වා ගන්න. ගෙදර ඇතුළතට එන පරාවර්තිත ආලෝකය ගහ හැදෙන්න ප්‍රමාණවත්. ඒ වගේම වතුර වැඩිපුර යොදන්න අවශ්‍ය වන්නේත් නැහැ. වතුර වැඩිවීමෙන් කඳ කුණු වීමක් සිදුවිය හැකියි.

පිටිමකුණා, මයිටාවන් වගේම කුඩිත්තන් මේ පැලයට හානි කරන පලිබෝධකයින් වනවා. ඒ ගැන වධානයෙන් සිටීමත් වැදගත්. නිසි පලිබෝධ නාශකයක් දීමෙන් ඒ තත්වයන් වළක්වා ගත හැකයි.

MONSTERA

අපි ඊළඟට ඔයාට හඳුන්වා දෙන්නේ තවත් හරිම ලස්සන ගෘහස්ථ පැලයක්. MONSTERA නමින් හඳුන්වන මේ පැලයේ කොළයේ තිබෙන අපූරු රටාව නිසාම අමුතු ලස්සනක් පරිසරයට එකතු කරනවා. ඒ වගේම මේකත් නිවාස ඇතුලේ තබාගත හැකි පැලයක්. සෘජු ආලෝකය ලැබීම සුදුසු වන්නේ නැහැ. ඒ වගේම වැඩිපුර ජලය දැමීමෙන් වැලකීම සුදුසුයි. දවස් 2,3කට සැරයක් පමණක් වතුර යෙදීම ප්‍රමාණවත්. එහෙම නොවුනොත් පැලයේ මුල් කුණුවී යාමට ඉඩ තිබෙනවා. ඒ වගේම ටිකක් වැඩිපුර ඉඩකඩ තියෙන බඳුනක වවාගන්න කියලත් අපි ඔබට මතක් කරනවා. එහෙම වුනොත් පැලයේ සැබෑ ලස්සන ඔයාගේ නිවසට / කාර්යාලයට එකතු කරගන්න පුළුවන් වෙන විදිහට පැලය සකස් කරගන්න ලැබේවි.

ගංගා වැලි කොටස් 1ක්, වියළි ගොම කොටස් 1ක්, කොළ පොහොර කොටස් 1ක් සහ ලොම්පස් කොටස් එකක් සමග අඟුරු කැබලි 1/4ක් මිශ්‍ර කිරීමෙන් වගා මාධ්‍ය සකස් කරගත හැකියි. මතක තබාගත යුතු තවත් වැදගත් දෙයක් තිබෙනවා. ඔයා මේ පැලය හිටවන්න ගන්න බඳුනේ පතුලට ජලය රඳා නොපවතින විදිහට ගල් හෝ උළුකැට කැබලි ස්ථරයක් අතුරා ගන්න අවශ්‍යයි.

මේ විදිහට සිටුවාගත් පලයේ කොළ කළුපැහැ වීමක් සිදුවුනොත් ඒ කියන්නෙ ඔයාගේ පැලය සිටවූ බඳුනේ වතුර රඳා පවතිනවා. ඒ නිසා පැලය ඉවත් කොට වගා මාධ්‍ය නැවත සකස් කිරීම අවශ්‍ය වනවා. සමහර විට ටික දවසකින් පත්‍ර දුඹුරු පාටක් ගන්නවා නිරීක්ෂණය කරන්න ලැබේවි. එහෙම වුනොත් ඒ කියන්නෙ වතුර අඩුවීම හෝ වැඩිවීමක් වෙලා තියෙන බව. පත්‍ර කහපාට වීමත් මේ වර්ගයේ නිතර දකින දෙයක්. ඒ කියන්නෙ ලැබෙන ආලෝකය ප්‍රමාණවත් නැහැ කියන එක. එහෙම වුනොත් තවත් ටිකක් එළිය ලැබෙන තැනකට පැලය මාරු කිරීම අවශ්‍යයි. පත්‍ර වල පුල්ලි හටගැනීමත් මේ පැලයට සිදුවිය හැකි නමුත් කලාතුරකින් හටගන්නා තත්වයක්. එවැනි තත්වයකදී දිලීර නාශකයක් යෙදීම ප්‍රමාණවත් වනවා.

Borsigina, Adansonii, Pinnatipartita, Obliqua, Silver Monstera, Swiss Cheese Plant, Mini Monstera වැනි ප්‍රභේද ගණනාවකින් ඔයාට මේ වර්ගය දැකගන්න ලැබෙනවා. කොහොම වුනත් ගෙදර ලස්සන කරන්න ලෝකයේ බොහෝ රටවල භාවිතයට ගන්නා මේ පැලය අපේ රටෙත් ඕනෑම දේශගුණ තත්වයක පහසුවෙන් සකස් කරගත හැකියි.

RUBBER PLANT

මොකක්ද මේ Rubber Plant..? මේ අපි දන්නා රබර් ශාඛය ද..? කෙනෙකුට එහෙමත් හිතෙන්න පුළුවන්. නමුත් මේ ඊට වඩා වෙනස් පැලයක්. නමුත් මේකට රබට් ප්ලාන්ට් කියන නම ලැබෙන්නේ මේ පැලයේ කොළය මතුපිට රබර් එකක් වගේ මතුපිටක් තිබීම හේතුවෙන්. විශාල පත්‍ර තියෙන මේ ගසේ කොළයත් විවිධ පාට රටා වලින් හඳුනා ගන්න පුළුවන්. විශේෂම දේ තමයි නිවාස ඇතුළත වගේම පිටතත් මේ පැලය තියන්න හැකිවීම. පිටතදී නම් ටිකක් උසින් වැඩි ගහක් විදිහට හැදෙනවා වුනත් නිවාස ඇතුළත නම් අඩි 6ක් වගේ උසකින් වර්ධනය නතර වනවා. විශේෂම කාරණය මේ පලය හරි කෙලින් කඳක් සහිතව උසට වැඩීම. ඒ නිසා නිවාස අලංකරණයට ඉතාම සුදුසු පැලයක් වනවා. රැකබලා ගැනීම සහ නඩත්තුව ඉතා අපහසු නොවුනත් යම් යම් උපක්‍රම භාවිතා කරන්න නම් වෙනවාමයි.

ඔයාට කැමති ප්‍රමාණයක පෝච්චියක් මේ පැලයට තෝරාගන්න පුළුවන්. නමුත් ටිකක් ඉඩකඩ සහිත පෝච්චියක් නම් වඩා සුදුසු වනවා. කොහුබත්, මතුපිට පස් සහ වැලි සමානව එකතු කරගෙන වගා මාධ්‍ය සකස් කරගැනීමට හැකියි. ඒ වගේම තමයි වගා මාධ්‍ය පෝච්චියට දමද්දී හොඳින් වාතනය සිදුවන පරිදි තිබිය යුතුයි. ඒ කියන්නෙ වගා මාධ්‍ය ලිහිල්ව පෝච්චියට දැමීම අත්‍යවශ්‍යයි. සෘජු ආලෝකය මේ පැලයට අවශ්‍ය වන්නේ නැහැ. පරාවර්තිත ආලෝකය ප්‍රමාණවත්. නමුත් කොළ හැලෙනවා නම් පමණක් වැඩිපුර ආලෝකය ලැබෙන තැනකට පැලය මාරු කිරීම කළ යුතුයි. සතියකට දෙවරක් උපරිම තුන් වරක් ජලය යෙදීම ප්‍රමාණවත්. ඊට වඩා ජලය දැමීම පැලයට හානිකර විය හැකියි. තෙත රෙදි කැබැල්ලකින් පැලයේ පත්‍ර මතුපිට පිසදැමීම සිදුකිරීමෙන් පත්‍ර පුටිකා විවර වීම සිදුවනවා. පත්‍ර වලට වඩා හොඳ දීප්තිමත් බවක් ලැබෙනවා.

ගෙදර ඇතුලේ පහසුවෙන් වවාගන්න පුළුවන් පල කිහිපයක් වගේම ඒ පල ගැන ඔයා අනිවාර්යෙන්ම දැනගන්න අවශ්‍ය කරුණු ටිකක් මේ විදිහට අපි ඔයාට කිවුවා. කලින්ම සඳහන් කළා වගේම පැලයකින් නිවසට අමුතු ලස්සනක් එකතු වනවා වගේම පැලයක් සිටුවීම සහ නඩත්තු කිරීම කියන්නෙ විඩාබර මනසට එක විදිහක අස්වැසිල්ලක්. ඒ අත්දැකීම විඳගන්න, ඔයාට තියෙන පුංචි ඉඩකඩේ වුනොත් පල කිහිපයක් වවන්න පටන් ගන්න කියලත් අපි යෝජනා කරනවා. ඔයා ළඟ දැනටමත් මේ වර්ගයේ පැල තියෙනවා නම්, ඒවායේ පින්තූරයක් comment කරගෙන යන්නත් අමතක කරන්න එපා. ගෙදර ඇතුලෙම ලෙහෙසියෙන්ම වවාගන්න පුළුවන් තවත් වර්ග කිහිපයක විස්තර අපි ඊළඟ ලිපියෙන් ඔබට කියන්නම්.